{"collection":"Bible & Christianity","html_url":"https://unchartedknowledge.5gfusion.net/browse/bib/vul/hag001.htm","path":"bib/vul/hag001.htm","source_url":"https://sacred-texts.com/bib/vul/hag001.htm","text":"1 In anno secundo Darii regis, in mense sexto, in die una mensis, factum est verbum Domini in manu Agg\u00e6i prophet\u00e6, ad Zorobabel, filium Salathiel, ducem Juda, et ad Jesum, filium Josedec, sacerdotem magnum, dicens:\n2 H\u00e6c ait Dominus exercituum, dicens: Populus iste dicit: Nondum venit tempus domus Domini \u00e6dificand\u00e6.\n3 Et factum est verbum Domini in manu Agg\u00e6i prophet\u00e6, dicens:\n4\u00a0[Numquid tempus vobis est ut habitetis in domibus laqueatis,\n et domus ista deserta?\n5\u00a0Et nunc h\u00e6c dicit Dominus exercituum:\n Ponite corda vestra super vias vestras.\n6\u00a0Seminastis multum, et intulistis parum;\n comedistis, et non estis satiati;\n bibistis, et non estis inebriati;\n operuistis vos, et non estis calefacti;\n et qui mercedes congregavit, misit eas in sacculum pertusum.\n7\u00a0H\u00e6c dicit Dominus exercituum:\n Ponite corda vestra super vias vestras;\n8\u00a0ascendite in montem, portate ligna, et \u00e6dificate domum:\n et acceptabilis mihi erit, et glorificabor, dicit Dominus.\n9\u00a0Respexistis ad amplius, et ecce factum est minus;\n et intulistis in domum, et exsufflavi illud:\n quam ob causam? dicit Dominus exercituum:\n quia domus mea deserta est,\n et vos festinatis unusquisque in domum suam.\n10\u00a0Propter hoc super vos prohibiti sunt c\u00e6li ne darent rorem,\n et terra prohibita est ne daret germen suum:\n11\u00a0et vocavi siccitatem super terram, et super montes,\n et super triticum, et super vinum, et super oleum,\n et qu\u00e6cumque profert humus,\n et super homines, et super jumenta,\n et super omnem laborem manuum.]\n12 Et audivit Zorobabel, filius Salathiel, et Jesus, filius Josedec, sacerdos magnus, et omnes reliqui\u00e6 populi, vocem Domini Dei sui, et verba Agg\u00e6i prophet\u00e6, sicut misit eum Dominus Deus eorum ad eos, et timuit populus a facie Domini.\n13 Et dixit Agg\u00e6us, nuntius Domini de nuntiis Domini, populo dicens: Ego vobiscum sum, dicit Dominus.\n14 Et suscitavit Dominus spiritum Zorobabel, filii Salathiel, ducis Juda, et spiritum Jesu, filii Josedec, sacerdotis magni, et spiritum reliquorum de omni populo: et ingressi sunt, et faciebant opus in domo Domini exercituum, Dei sui.","title":"Vulgate: Haggai: Haggai Chapter 1","type":"page"}