{"collection":"Bible & Christianity","html_url":"https://unchartedknowledge.5gfusion.net/browse/bib/vul/hag002.htm","path":"bib/vul/hag002.htm","source_url":"https://sacred-texts.com/bib/vul/hag002.htm","text":"1\u00a0In die vigesima et quarta mensis, in sexto mense, in anno secundo Darii regis.\n \n2 In septimo mense, vigesima et prima mensis, factum est verbum Domini in manu Agg\u00e6i prophet\u00e6, dicens:\n3 Loquere ad Zorobabel, filium Salathiel, ducem Juda, et ad Jesum, filium Josedec, sacerdotem magnum, et ad reliquos populi, dicens:\n4\u00a0[Quis in vobis est derelictus,\n qui vidit domum istam in gloria sua prima?\n et quid vos videtis hanc nunc?\n numquid non ita est, quasi non sit in oculis vestris?\n5\u00a0Et nunc confortare, Zorobabel, dicit Dominus;\n et confortare, Jesu, fili Josedec, sacerdos magne;\n et confortare, omnis populus terr\u00e6, dicit Dominus exercituum:\n et facite (quoniam ego vobiscum sum, dicit Dominus exercituum)\n6\u00a0verbum quod pepigi vobiscum cum egrederemini de terra \u00c6gypti:\n et spiritus meus erit in medio vestrum: nolite timere.\n7\u00a0Quia h\u00e6c dicit Dominus exercituum:\n Adhuc unum modicum est,\n et ego commovebo c\u00e6lum, et terram, et mare, et aridam.\n8\u00a0Et movebo omnes gentes,\n et veniet desideratus cunctis gentibus:\n et implebo domum istam gloria,\n dicit Dominus exercituum.\n9\u00a0Meum est argentum, et meum est aurum,\n dicit Dominus exercituum.\n10\u00a0Magna erit gloria domus istius novissim\u00e6 plus quam prim\u00e6,\n dicit Dominus exercituum:\n et in loco isto dabo pacem,\n dicit Dominus exercituum.]\n \n11 In vigesima et quarta noni mensis, in anno secundo Darii regis, factum est verbum Domini ad Agg\u00e6um prophetam, dicens:\n12 H\u00e6c dicit Dominus exercituum: Interroga sacerdotes legem, dicens:\n13 Si tulerit homo carnem sanctificatam in ora vestimenti sui, et tetigerit de summitate ejus panem, aut pulmentum, aut vinum, aut oleum, aut omnem cibum, numquid sanctificabitur? Respondentes autem sacerdotes, dixerunt: Non.\n14 Et dixit Agg\u00e6us: Si tetigerit pollutus in anima ex omnibus his, numquid contaminabitur? Et responderunt sacerdotes, et dixerunt: Contaminabitur.\n15\u00a0Et respondit Agg\u00e6us, et dixit: [Sic populus iste,\n et sic gens ista ante faciem meam, dicit Dominus,\n et sic omne opus manuum eorum:\n et omnia qu\u00e6 obtulerunt ibi, contaminata erunt.\n16\u00a0Et nunc ponite corda vestra a die hac et supra,\n antequam poneretur lapis super lapidem in templo Domini.\n17\u00a0Cum accederetis ad acervum viginti modiorum,\n et fierent decem;\n et intraretis ad torcular, ut exprimeretis quinquaginta lagenas,\n et fiebant viginti.\n18\u00a0Percussi vos vento urente, et aurugine,\n et grandine omnia opera manuum vestrarum:\n et non fuit in vobis qui reverteretur ad me, dicit Dominus.\n19\u00a0Ponite corda vestra ex die ista, et in futurum,\n a die vigesima et quarta noni mensis:\n a die qua fundamenta jacta sunt templi Domini,\n ponite super cor vestrum.\n20\u00a0Numquid jam semen in germine est,\n et adhuc vinea, et ficus,\n et malogranatum, et lignum oliv\u00e6 non floruit? ex die ista benedicam.]\n \n21 Et factum est verbum Domini secundo ad Agg\u00e6um in vigesima et quarta mensis, dicens:\n22\u00a0Loquere ad Zorobabel ducem Juda, dicens: [Ego movebo c\u00e6lum pariter et terram,\n23\u00a0et subvertam solium regnorum,\n et conteram fortitudinem regni gentium:\n et subvertam quadrigam et ascensorem ejus,\n et descendent equi, et ascensores eorum,\n vir in gladio fratris sui.\n24\u00a0In die illa, dicit Dominus exercituum, assumam te,\n Zorobabel, fili Salathiel, serve meus, dicit Dominus:\n et ponam te quasi signaculum,\n quia te elegi, dicit Dominus exercituum.]","title":"Vulgate: Haggai: Haggai Chapter 2","type":"page"}