{"collection":"Bible & Christianity","html_url":"https://unchartedknowledge.5gfusion.net/browse/bib/vul/heb005.htm","path":"bib/vul/heb005.htm","source_url":"https://sacred-texts.com/bib/vul/heb005.htm","text":"1 Omnis namque pontifex ex hominibus assumptus, pro hominibus constituitur in iis qu\u00e6 sunt ad Deum, ut offerat dona, et sacrificia pro peccatis:\n2 qui condolere possit iis qui ignorant et errant: quoniam et ipse circumdatus est infirmitate:\n3 et propterea debet, quemadmodum pro populo, ita etiam et pro semetipso offerre pro peccatis.\n4 Nec quisquam sumit sibi honorem, sed qui vocatur a Deo, tamquam Aaron.\n5 Sic et Christus non semetipsum clarificavit ut pontifex fieret: sed qui locutus est ad eum: Filius meus es tu, ego hodie genui te.\n6 Quemadmodum et in alio loco dicit: Tu es sacerdos in \u00e6ternum, secundum ordinem Melchisedech.\n7 Qui in diebus carnis su\u00e6 preces, supplicationesque ad eum qui possit illum salvum facere a morte cum clamore valido, et lacrimis offerens, exauditus est pro sua reverentia.\n8 Et quidem cum esset Filius Dei, didicit ex iis, qu\u00e6 passus est, obedientiam:\n9 et consummatus, factus est omnibus obtemperantibus sibi, causa salutis \u00e6tern\u00e6,\n10\u00a0appellatus a Deo pontifex juxta ordinem Melchisedech.\n \n11 De quo nobis grandis sermo, et ininterpretabilis ad dicendum: quoniam imbecilles facti estis ad audiendum.\n12 Etenim cum deberetis magistri esse propter tempus, rursum indigetis ut vos doceamini qu\u00e6 sint elementa exordii sermonum Dei: et facti estis quibus lacte opus sit, non solido cibo.\n13 Omnis enim, qui lactis est particeps, expers est sermonis justiti\u00e6: parvulus enim est.\n14 Perfectorum autem est solidus cibus: eorum, qui pro consuetudine exercitatos habent sensus ad discretionem boni ac mali.","title":"Vulgate: Hebrews: Hebrews Chapter 5","type":"page"}