{"collection":"Bible & Christianity","html_url":"https://unchartedknowledge.5gfusion.net/browse/bib/vul/heb013.htm","path":"bib/vul/heb013.htm","source_url":"https://sacred-texts.com/bib/vul/heb013.htm","text":"1 Caritas fraternitatis maneat in vobis,\n2 et hospitalitatem nolite oblivisci: per hanc enim latuerunt quidam, angelis hospitio receptis.\n3 Mementote vinctorum, tamquam simul vincti: et laborantium, tamquam et ipsi in corpore morantes.\n4 Honorabile connubium in omnibus, et thorus immaculatus. Fornicatores enim, et adulteros judicabit Deus.\n5 Sint mores sine avaritia, contenti pr\u00e6sentibus: ipse enim dixit: Non te deseram, neque derelinquam:\n6 ita ut confidenter dicamus: Dominus mihi adjutor: non timebo quid faciat mihi homo.\n7 Mementote pr\u00e6positorum vestrorum, qui vobis locuti sunt verbum Dei: quorum intuentes exitum conversationis, imitamini fidem.\n8 Jesus Christus heri, et hodie: ipse et in s\u00e6cula.\n9 Doctrinis variis et peregrinis nolite abduci. Optimum est enim gratia stabilire cor, non escis: qu\u00e6 non profuerunt ambulantibus in eis.\n10 Habemus altare, de quo edere non habent potestatem, qui tabernaculo deserviunt.\n11 Quorum enim animalium infertur sanguis pro peccato in Sancta per pontificem, horum corpora cremantur extra castra.\n12 Propter quod et Jesus, ut sanctificaret per suum sanguinem populum, extra portam passus est.\n13 Exeamus igitur ad eum extra castra, improperium ejus portantes.\n14 Non enim habemus hic manentem civitatem, sed futuram inquirimus.\n15 Per ipsum ergo offeramus hostiam laudis semper Deo, id est, fructum labiorum confitentium nomini ejus.\n16 Beneficenti\u00e6 autem et communionis nolite oblivisci: talibus enim hostiis promeretur Deus.\n17\u00a0Obedite pr\u00e6positis vestris, et subjacete eis. Ipsi enim pervigilant quasi rationem pro animabus vestris reddituri, ut cum gaudio hoc faciant, et non gementes: hoc enim non expedit vobis.\n \n18 Orate pro nobis: confidimus enim quia bonam conscientiam habemus in omnibus bene volentes conversari.\n19 Amplius autem deprecor vos hoc facere, quo celerius restituar vobis.\n20 Deus autem pacis, qui eduxit de mortuis pastorem magnum ovium, in sanguine testamenti \u00e6terni, Dominum nostrum Jesum Christum,\n21 aptet vos in omni bono, ut faciatis ejus voluntatem: faciens in vobis quod placeat coram se per Jesum Christum: cui est gloria in s\u00e6cula s\u00e6culorum. Amen.\n22 Rogo autem vos fratres, ut sufferatis verbum solatii. Etenim perpaucis scripsi vobis.\n23 Cognoscite fratrem nostrum Timotheum dimissum: cum quo (si celerius venerit) videbo vos.\n24 Salutate omnes pr\u00e6positos vestros, et omnes sanctos. Salutant vos de Italia fratres.\n25 Gratia cum omnibus vobis. Amen.","title":"Vulgate: Hebrews: Hebrews Chapter 13","type":"page"}