{"collection":"Bible & Christianity","html_url":"https://unchartedknowledge.5gfusion.net/browse/bib/vul/hos001.htm","path":"bib/vul/hos001.htm","source_url":"https://sacred-texts.com/bib/vul/hos001.htm","text":"1\u00a0Verbum Domini, quod factum est ad Osee, filium Beeri, in diebus Ozi\u00e6, Joathan, Achaz, Ezechi\u00e6, regum Juda; et in diebus Jeroboam, filii Joas, regis Isra\u00ebl.\n \n2 Principium loquendi Domino in Osee. Et dixit Dominus ad Osee: Vade, sume tibi uxorem fornicationum, et fac tibi filios fornicationum, quia fornicans fornicabitur terra a Domino.\n3 Et abiit, et accepit Gomer, filiam Debelaim: et concepit, et peperit ei filium.\n4 Et dixit Dominus ad eum: Voca nomen ejus Jezrahel, quoniam adhuc modicum, et visitabo sanguinem Jezrahel super domum Jehu, et quiescere faciam regnum domus Isra\u00ebl.\n5 Et in illa die conteram arcum Isra\u00ebl in valle Jezrahel.\n6 Et concepit adhuc, et peperit filiam. Et dixit ei: Voca nomen ejus, Absque misericordia, quia non addam ultra misereri domui Isra\u00ebl, sed oblivione obliviscar eorum.\n7 Et domui Juda miserebor, et salvabo eos in Domino Deo suo; et non salvabo eos in arcu et gladio, et in bello, et in equis, et in equitibus.\n8 Et ablactavit eam qu\u00e6 erat Absque misericordia. Et concepit, et peperit filium.\n9 Et dixit: Voca nomen ejus, Non populus meus, quia vos non populus meus, et ego non ero vester.\n10 Et erit numerus filiorum Isra\u00ebl quasi arena maris, qu\u00e6 sine mensura est, et non numerabitur. Et erit in loco ubi dicetur eis: Non populus meus vos: dicetur eis: Filii Dei viventis.\n11 Et congregabuntur filii Juda et filii Isra\u00ebl pariter; et ponent sibimet caput unum, et ascendent de terra, quia magnus dies Jezrahel.","title":"Vulgate: Hosea: Hosea Chapter 1","type":"page"}