{"collection":"Bible & Christianity","html_url":"https://unchartedknowledge.5gfusion.net/browse/bib/vul/hos002.htm","path":"bib/vul/hos002.htm","source_url":"https://sacred-texts.com/bib/vul/hos002.htm","text":"1\u00a0Dicite fratribus vestris: Populus meus; et sorori vestr\u00e6: Misericordiam consecuta.\n \n2\u00a0[Judicate matrem vestram, judicate,\n quoniam ipsa non uxor mea,\n et ego non vir ejus.\n Auferat fornicationes suas a facie sua,\n et adulteria sua de medio uberum suorum;\n3\u00a0ne forte expoliem eam nudam,\n et statuam eam secundum diem nativitatis su\u00e6,\n et ponam eam quasi solitudinem,\n et statuam eam velut terram inviam,\n et interficiam eam siti.\n4\u00a0Et filiorum illius non miserebor,\n quoniam filii fornicationum sunt.\n5\u00a0Quia fornicata est mater eorum,\n confusa est qu\u00e6 concepit eos;\n quia dixit: Vadam post amatores meos,\n qui dant panes mihi, et aquas meas,\n lanam meam, et linum meum,\n oleum meum, et potum meum.\n6\u00a0Propter hoc ecce ego sepiam viam tuam spinis,\n et sepiam eam maceria, et semitas suas non inveniet.\n7\u00a0Et sequetur amatores suos, et non apprehendet eos;\n et qu\u00e6ret eos, et non inveniet:\n et dicet: Vadam, et revertar ad virum meum priorem,\n quia bene mihi erat tunc magis quam nunc.\n8\u00a0Et h\u00e6c nescivit, quia ego dedi ei frumentum, et vinum, et oleum,\n et argentum multiplicavi ei, et aurum,\n qu\u00e6 fecerunt Baal.\n9\u00a0Idcirco convertar, et sumam frumentum meum in tempore suo,\n et vinum meum in tempore suo.\n Et liberabo lanam meam et linum meum,\n qu\u00e6 operiebant ignominiam ejus.\n10\u00a0Et nunc revelabo stultitiam ejus in oculis amatorum ejus;\n et vir non eruet eam de manu mea;\n11\u00a0et cessare faciam omne gaudium ejus,\n solemnitatem ejus, neomeniam ejus, sabbatum ejus,\n et omnia festa tempora ejus.\n12\u00a0Et corrumpam vineam ejus, et ficum ejus,\n de quibus dixit: Mercedes h\u00e6 me\u00e6 sunt,\n quas dederunt mihi amatores mei;\n et ponam eam in saltum,\n et comedet eam bestia agri.\n13\u00a0Et visitabo super eam dies Baalim,\n quibus accendebat incensum,\n et ornabatur in aure sua, et monili suo.\n Et ibat post amatores suos,\n et mei obliviscebatur, dicit Dominus.\n14\u00a0Propter hoc ecce ego lactabo eam,\n et ducam eam in solitudinem,\n et loquar ad cor ejus.\n15\u00a0Et dabo ei vinitores ejus ex eodem loco,\n et vallem Achor, ad aperiendam spem;\n et canet ibi juxta dies juventutis su\u00e6,\n et juxta dies ascensionis su\u00e6 de terra \u00c6gypti.\n16\u00a0Et erit in die illa, ait Dominus:\n vocabit me, Vir meus,\n et non vocabit me ultra Baali.\n17\u00a0Et auferam nomina Baalim de ore ejus,\n et non recordabitur ultra nominis eorum.\n18\u00a0Et percutiam cum eis f\u0153dus in die illa, cum bestia agri,\n et cum volucre c\u00e6li, et cum reptili terr\u00e6;\n et arcum, et gladium, et bellum conteram de terra,\n et dormire eos faciam fiducialiter.\n19\u00a0Et sponsabo te mihi in sempiternum;\n et sponsabo te mihi in justitia, et judicio,\n et in misericordia, et in miserationibus.\n20\u00a0Et sponsabo te mihi in fide;\n et scies quia ego Dominus.\n21\u00a0Et erit in die illa:\n exaudiam, dicit Dominus, exaudiam c\u00e6los,\n et illi exaudient terram.\n22\u00a0Et terra exaudiet triticum, et vinum, et oleum,\n et h\u00e6c exaudient Jezrahel.\n23\u00a0Et seminabo eam mihi in terra,\n et miserebor ejus qu\u00e6 fuit Absque misericordia.\n24\u00a0Et dicam Non populo meo: Populus meus es tu;\n et ipse dicet: Deus meus es tu.]","title":"Vulgate: Hosea: Hosea Chapter 2","type":"page"}