{"collection":"Bible & Christianity","html_url":"https://unchartedknowledge.5gfusion.net/browse/bib/vul/hos005.htm","path":"bib/vul/hos005.htm","source_url":"https://sacred-texts.com/bib/vul/hos005.htm","text":"1\u00a0[Audite hoc, sacerdotes, \n et attendite, domus Isra\u00ebl,\n et domus regis, auscultate:\n quia vobis judicium est,\n quoniam laqueus facti estis speculationi,\n et rete expansum super Thabor.\n2\u00a0Et victimas declinastis in profundum;\n et ego eruditor omnium eorum.\n3\u00a0Ego scio Ephraim,\n et Isra\u00ebl non est absconditus a me:\n quia nunc fornicatus est Ephraim;\n contaminatus est Isra\u00ebl.\n4\u00a0Non dabunt cogitationes suas ut revertantur ad Deum suum,\n quia spiritus fornicationum in medio eorum,\n et Dominum non cognoverunt.\n5\u00a0Et respondebit arrogantia Isra\u00ebl in facie ejus,\n et Isra\u00ebl et Ephraim ruent in iniquitate sua:\n ruet etiam Judas cum eis.\n6\u00a0In gregibus suis et in armentis suis vadent ad qu\u00e6rendum Dominum,\n et non invenient:\n ablatus est ab eis.\n7\u00a0In Dominum pr\u00e6varicati sunt,\n quia filios alienos genuerunt:\n nunc devorabit eos mensis, cum partibus suis.\n8\u00a0Clangite buccina in Gabaa,\n tuba in Rama;\n ululate in Bethaven,\n post tergum tuum, Benjamin.\n9\u00a0Ephraim in desolatione erit in die correptionis;\n in tribubus Isra\u00ebl ostendi fidem.\n10\u00a0Facti sunt principes Juda quasi assumentes terminum;\n super eos effundam quasi aquam iram meam.\n11\u00a0Calumniam patiens est Ephraim, fractus judicio,\n quoniam c\u0153pit abire post sordes.\n12\u00a0Et ego quasi tinea Ephraim,\n et quasi putredo domui Juda.\n13\u00a0Et vidit Ephraim languorem suum,\n et Juda vinculum suum;\n et abiit Ephraim ad Assur,\n et misit ad regem ultorem:\n et ipse non poterit sanare vos,\n nec solvere poterit a vobis vinculum.\n14\u00a0Quoniam ego quasi le\u00e6na Ephraim,\n et quasi catulus leonis domui Juda.\n Ego, ego capiam, et vadam;\n tollam, et non est qui eruat.\n15\u00a0Vadens revertar ad locum meum,\n donec deficiatis, et qu\u00e6ratis faciem meam.]","title":"Vulgate: Hosea: Hosea Chapter 5","type":"page"}