{"collection":"Bible & Christianity","html_url":"https://unchartedknowledge.5gfusion.net/browse/bib/vul/hos007.htm","path":"bib/vul/hos007.htm","source_url":"https://sacred-texts.com/bib/vul/hos007.htm","text":"1\u00a0[Cum sanare vellem Isra\u00ebl,\n revelata est iniquitas Ephraim,\n et malitia Samari\u00e6,\n quia operati sunt mendacium;\n et fur ingressus est spolians,\n latrunculus foris.\n2\u00a0Et ne forte dicant in cordibus suis,\n omnem malitiam eorum me recordatum,\n nunc circumdederunt eos adinventiones su\u00e6:\n coram facie mea fact\u00e6 sunt.\n3\u00a0In malitia sua l\u00e6tificaverunt regem,\n et in mendaciis suis principes.\n4\u00a0Omnes adulterantes,\n quasi clibanus succensus a coquente;\n quievit paululum civitas a commistione fermenti,\n donec fermentaretur totum.\n5\u00a0Dies regis nostri: c\u0153perunt principes furere a vino;\n extendit manum suam cum illusoribus.\n6\u00a0Quia applicuerunt quasi clibanum cor suum,\n cum insidiaretur eis;\n tota nocte dormivit coquens eos:\n mane ipse succensus quasi ignis flamm\u00e6.\n7\u00a0Omnes calefacti sunt quasi clibanus,\n et devoraverunt judices suos:\n omnes reges eorum ceciderunt;\n non est qui clamat in eis ad me.\n8\u00a0Ephraim in populis ipse commiscebatur;\n Ephraim factus est subcinericius panis, qui non reversatur.\n9\u00a0Comederunt alieni robur ejus, et ipse nescivit;\n sed et cani effusi sunt in eo, et ipse ignoravit.\n10\u00a0Et humiliabitur superbia Isra\u00ebl in facie ejus;\n nec reversi sunt ad Dominum Deum suum,\n et non qu\u00e6sierunt eum in omnibus his.\n11\u00a0Et factus est Ephraim quasi columba seducta non habens cor.\n \u00c6gyptum invocabant; ad Assyrios abierunt.\n12\u00a0Et cum profecti fuerint,\n expandam super eos rete meum:\n quasi volucrem c\u00e6li detraham eos;\n c\u00e6dam eos secundum auditionem c\u0153tus eorum.\n13\u00a0V\u00e6 eis, quoniam recesserunt a me!\n vastabuntur, quia pr\u00e6varicati sunt in me,\n et ego redemi eos,\n et ipsi locuti sunt contra me mendacia.\n14\u00a0Et non clamaverunt ad me in corde suo,\n sed ululabant in cubilibus suis:\n super triticum et vinum ruminabant;\n recesserunt a me.\n15\u00a0Et ego erudivi eos, et confortavi brachia eorum,\n et in me cogitaverunt malitiam.\n16\u00a0Reversi sunt ut essent absque jugo;\n facti sunt quasi arcus dolosus:\n cadent in gladio principes eorum, a furore lingu\u00e6 su\u00e6.\n Ista subsannatio eorum in terra \u00c6gypti.]","title":"Vulgate: Hosea: Hosea Chapter 7","type":"page"}