{"collection":"Bible & Christianity","html_url":"https://unchartedknowledge.5gfusion.net/browse/bib/vul/hos008.htm","path":"bib/vul/hos008.htm","source_url":"https://sacred-texts.com/bib/vul/hos008.htm","text":"1\u00a0[In gutture tuo sit tuba\n quasi aquila super domum Domini,\n pro eo quod transgressi sunt f\u0153dus meum,\n et legem meam pr\u00e6varicati sunt.\n2\u00a0Me invocabunt: Deus meus,\n cognovimus te Isra\u00ebl.\n3\u00a0Projecit Isra\u00ebl bonum:\n inimicus persequetur eum.\n4\u00a0Ipsi regnaverunt, et non ex me;\n principes exstiterunt, et non cognovi:\n argentum suum et aurum suum fecerunt sibi idola,\n ut interirent.\n5\u00a0Projectus est vitulus tuus, Samaria;\n iratus est furor meus in eos.\n Usquequo non poterunt emundari?\n6\u00a0Quia ex Isra\u00ebl et ipse est:\n artifex fecit illum, et non est deus;\n quoniam in aranearum telas erit vitulus Samari\u00e6.\n7\u00a0Quia ventum seminabunt,\n et turbinem metent:\n culmus stans non est in eo;\n germen non faciet farinam:\n quod etsi fecerit, alieni comedent eam.\n8\u00a0Devoratus est Isra\u00ebl;\n nunc factus est in nationibus quasi vas immundum.\n9\u00a0Quia ipsi ascenderunt ad Assur,\n onager solitarius sibi;\n Ephraim munera dederunt amatoribus.\n10\u00a0Sed et cum mercede conduxerint nationes,\n nunc congregabo eos,\n et quiescent paulisper ab onere regis et principum.\n11\u00a0Quia multiplicavit Ephraim altaria ad peccandum;\n fact\u00e6 sunt ei ar\u00e6 in delictum.\n12\u00a0Scribam ei multiplices leges meas,\n qu\u00e6 velut alien\u00e6 computat\u00e6 sunt.\n13\u00a0Hostias offerent,\n immolabunt carnes et comedent,\n et Dominus non suscipiet eas:\n nunc recordabitur iniquitatis eorum,\n et visitabit peccata eorum:\n ipsi in \u00c6gyptum convertentur.\n14\u00a0Et oblitus est Isra\u00ebl factoris sui,\n et \u00e6dificavit delubra;\n et Judas multiplicavit urbes munitas;\n et mittam ignem in civitates ejus,\n et devorabit \u00e6des illius.]","title":"Vulgate: Hosea: Hosea Chapter 8","type":"page"}