{"collection":"Bible & Christianity","html_url":"https://unchartedknowledge.5gfusion.net/browse/bib/vul/hos010.htm","path":"bib/vul/hos010.htm","source_url":"https://sacred-texts.com/bib/vul/hos010.htm","text":"1\u00a0[Vitis frondosa Isra\u00ebl,\n fructus ad\u00e6quatus est ei:\n secundum multitudinem fructus sui multiplicavit altaria,\n juxta ubertatem terr\u00e6 su\u00e6 exuberavit simulacris.\n2\u00a0Divisum est cor eorum, nunc interibunt;\n ipse confringet simulacra eorum,\n depopulabitur aras eorum.\n3\u00a0Quia nunc dicent: Non est rex nobis,\n non enim timemus Dominum;\n et rex quid faciet nobis?\n4\u00a0Loquimini verba visionis inutilis, et ferietis f\u0153dus;\n et germinabit quasi amaritudo judicium super sulcos agri.\n5\u00a0Vaccas Bethaven coluerunt habitatores Samari\u00e6;\n quia luxit super eum populus ejus,\n et \u00e6ditui ejus super eum exsultaverunt\n in gloria ejus, quia migravit ab eo.\n6\u00a0Siquidem et ipse in Assur delatus est,\n munus regi ultori.\n Confusio Ephraim capiet,\n et confundetur Isra\u00ebl in voluntate sua.\n7\u00a0Transire fecit Samaria regem suum\n quasi spumam super faciem aqu\u00e6.\n8\u00a0Et disperdentur excelsa idoli, peccatum Isra\u00ebl;\n lappa et tribulus ascendet super aras eorum:\n et dicent montibus: Operite nos,\n et collibus: Cadite super nos.\n9\u00a0Ex diebus Gabaa peccavit Isra\u00ebl;\n ibi steterunt.\n Non comprehendet eos in Gabaa\n pr\u00e6lium super filios iniquitatis.\n10\u00a0Juxta desiderium meum corripiam eos:\n congregabuntur super eos populi,\n cum corripientur propter duas iniquitates suas.\n11\u00a0Ephraim vitula docta diligere trituram,\n et ego transivi super pulchritudinem colli ejus:\n ascendam super Ephraim,\n arabit Judas;\n confringet sibi sulcos Jacob.\n12\u00a0Seminate vobis in justitia,\n et metite in ore misericordi\u00e6.\n Innovate vobis novale;\n tempus autem requirendi Dominum,\n cum venerit qui docebit vos justitiam.\n13\u00a0Arastis impietatem,\n iniquitatem messuistis:\n comedistis frugem mendacii,\n quia confisus es in viis tuis,\n in multitudine fortium tuorum.\n14\u00a0Consurget tumultus in populo tuo;\n et omnes munitiones tu\u00e6 vastabuntur,\n sicut vastatus est Salmana a domo ejus qui judicavit Baal\n in die pr\u00e6lii, matre super filios allisa.\n15\u00a0Sic fecit vobis Bethel,\n a facie maliti\u00e6 nequitiarum vestrarum.]","title":"Vulgate: Hosea: Hosea Chapter 10","type":"page"}