{"collection":"Bible & Christianity","html_url":"https://unchartedknowledge.5gfusion.net/browse/bib/vul/hos012.htm","path":"bib/vul/hos012.htm","source_url":"https://sacred-texts.com/bib/vul/hos012.htm","text":"1\u00a0[Ephraim pascit ventum,\n et sequitur \u00e6stum;\n tota die mendacium et vastitatem multiplicat:\n et f\u0153dus cum Assyriis iniit,\n et oleum in \u00c6gyptum ferebat.\n2\u00a0Judicium ergo Domini cum Juda,\n et visitatio super Jacob:\n juxta vias ejus, et juxta adinventiones ejus reddet ei.\n3\u00a0In utero supplantavit fratrem suum,\n et in fortitudine sua directus est cum angelo.\n4\u00a0Et invaluit ad angelum, et confortatus est;\n flevit, et rogavit eum.\n In Bethel invenit eum,\n et ibi locutus est nobiscum.\n5\u00a0Et Dominus Deus exercituum,\n Dominus memoriale ejus.\n6\u00a0Et tu ad Deum tuum converteris;\n misericordiam et judicium custodi,\n et spera in Deo tuo semper.\n7\u00a0Chanaan, in manu ejus statera dolosa,\n calumniam dilexit.\n8\u00a0Et dixit Ephraim: Verumtamen dives effectus sum;\n inveni idolum mihi:\n omnes labores mei non invenient mihi iniquitatem quam peccavi.\n9\u00a0Et ego Dominus Deus tuus ex terra \u00c6gypti:\n adhuc sedere te faciam in tabernaculis, sicut in diebus festivitatis.\n10\u00a0Et locutus sum super prophetas,\n et ego visionem multiplicavi,\n et in manu prophetarum assimilatus sum.\n11\u00a0Si Galaad idolum, ergo frustra erant in Galgal bobus immolantes;\n nam et altaria eorum quasi acervi super sulcos agri.\n12\u00a0Fugit Jacob in regionem Syri\u00e6,\n et servivit Isra\u00ebl in uxorem,\n et in uxorem servavit.\n13\u00a0In propheta autem eduxit Dominus Isra\u00ebl de \u00c6gypto,\n et in propheta servatus est.\n14\u00a0Ad iracundiam me provocavit Ephraim in amaritudinibus suis:\n et sanguis ejus super eum veniet,\n et opprobrium ejus restituet ei Dominus suus.]","title":"Vulgate: Hosea: Hosea Chapter 12","type":"page"}