{"collection":"Bible & Christianity","html_url":"https://unchartedknowledge.5gfusion.net/browse/bib/vul/hos014.htm","path":"bib/vul/hos014.htm","source_url":"https://sacred-texts.com/bib/vul/hos014.htm","text":"1\u00a0[Pereat Samaria, quoniam ad amaritudinem concitavit Deum suum!\n in gladio pereant,\n parvuli eorum elidantur,\n et f\u0153t\u00e6 ejus discindantur!]\n \n2\u00a0[Convertere, Isra\u00ebl, ad Dominum Deum tuum,\n quoniam corruisti in iniquitate tua.\n3\u00a0Tollite vobiscum verba,\n et convertimini ad Dominum; et dicite ei:\n Omnem aufer iniquitatem, accipe bonum,\n et reddemus vitulos labiorum nostrorum.\n4\u00a0Assur non salvabit nos:\n super equum non ascendemus,\n nec dicemus ultra, Dii nostri opera manuum nostrarum:\n quia ejus, qui in te est, misereberis pupilli.\n5\u00a0Sanabo contritiones eorum;\n diligam eos spontanee:\n quia aversus est furor meus ab eis.\n6\u00a0Ero quasi ros;\n Isra\u00ebl germinabit sicut lilium,\n et erumpet radix ejus ut Libani.\n7\u00a0Ibunt rami ejus,\n et erit quasi oliva gloria ejus,\n et odor ejus ut Libani.\n8\u00a0Convertentur sedentes in umbra ejus;\n vivent tritico, et germinabunt quasi vinea;\n memoriale ejus sicut vinum Libani.\n9\u00a0Ephraim, quid mihi ultra idola?\n Ego exaudiam, et dirigam eum ego ut abietem virentem;\n ex me fructus tuus inventus est.\n10\u00a0Quis sapiens, et intelliget ista? intelligens, et sciet h\u00e6c?\n quia rect\u00e6 vi\u00e6 Domini,\n et justi ambulabunt in eis;\n pr\u00e6varicatores vero corruent in eis.]","title":"Vulgate: Hosea: Hosea Chapter 14","type":"page"}