{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa001.htm","path":"bib/vul/isa001.htm","source_url":"https://sacred-texts.com/bib/vul/isa001.htm","text":"1\u00a0Visio Isai\u00e6, filii Amos, quam vidit super Judam et Jerusalem, in diebus Ozi\u00e6, Joathan, Achaz, et Ezechi\u00e6, regum Juda.\n \n2\u00a0[Audite, c\u00e6li, et auribus percipe, terra,\n quoniam Dominus locutus est.\n Filios enutrivi, et exaltavi;\n ipsi autem spreverunt me.\n3\u00a0Cognovit bos possessorem suum,\n et asinus pr\u00e6sepe domini sui;\n Isra\u00ebl autem me non cognovit,\n et populus meus non intellexit.\n4\u00a0V\u00e6 genti peccatrici,\n populo gravi iniquitate,\n semini nequam, filiis sceleratis!\n dereliquerunt Dominum;\n blasphemaverunt Sanctum Isra\u00ebl;\n abalienati sunt retrorsum.\n5\u00a0Super quo percutiam vos ultra, addentes pr\u00e6varicationem?\n omne caput languidum,\n et omne cor m\u0153rens.\n6\u00a0A planta pedis usque ad verticem,\n non est in eo sanitas;\n vulnus, et livor, et plaga tumens,\n non est circumligata, nec curata medicamine,\n neque fota oleo.\n7\u00a0Terra vestra deserta;\n civitates vestr\u00e6 succens\u00e6 igni:\n regionem vestram coram vobis alieni devorant,\n et desolabitur sicut in vastitate hostili.\n8\u00a0Et derelinquetur filia Sion\n ut umbraculum in vinea,\n et sicut tugurium in cucumerario,\n et sicut civitas qu\u00e6 vastatur.\n9\u00a0Nisi Dominus exercituum\n reliquisset nobis semen,\n quasi Sodoma fuissemus,\n et quasi Gomorrha similes essemus.\n10\u00a0Audite verbum Domini,\n principes Sodomorum;\n percipite auribus legem Dei nostri,\n populus Gomorrh\u00e6.\n11\u00a0Quo mihi multitudinem victimarum vestrarum?\n dicit Dominus.\n Plenus sum:\n holocausta arietum,\n et adipem pinguium,\n et sanguinem vitulorum et agnorum et hircorum,\n nolui.\n12\u00a0Cum veniretis ante conspectum meum,\n quis qu\u00e6sivit h\u00e6c de manibus vestris,\n ut ambularetis in atriis meis?\n13\u00a0Ne offeratis ultra sacrificium frustra:\n incensum abominatio est mihi.\n Neomeniam et sabbatum, et festivitates alias, non feram;\n iniqui sunt c\u0153tus vestri.\n14\u00a0Calendas vestras, et solemnitates vestras odivit anima mea:\n facta sunt mihi molesta; laboravi sustinens.\n15\u00a0Et cum extenderitis manus vestras, avertam oculos meos a vobis,\n et cum multiplicaveritis orationem, non exaudiam:\n manus enim vestr\u00e6 sanguine plen\u00e6 sunt.\n16\u00a0Lavamini, mundi estote;\n auferte malum cogitationum vestrarum\n ab oculis meis:\n quiescite agere perverse,\n17\u00a0discite benefacere;\n qu\u00e6rite judicium, subvenite oppresso,\n judicate pupillo, defendite viduam.]\n \n18\u00a0[Et venite, et arguite me, dicit Dominus.\n Si fuerint peccata vestra ut coccinum,\n quasi nix dealbabuntur;\n et si fuerint rubra quasi vermiculus,\n velut lana alba erunt.\n19\u00a0Si volueritis, et audieritis me,\n bona terr\u00e6 comeditis.\n20\u00a0Quod si nolueritis, et me ad iracundiam provocaveritis,\n gladius devorabit vos,\n quia os Domini locutum est.\n21\u00a0Quomodo facta est meretrix\n civitas fidelis, plena judicii?\n justitia habitavit in ea,\n nunc autem homicid\u00e6.\n22\u00a0Argentum tuum versum est in scoriam;\n vinum tuum mistum est aqua.\n23\u00a0Principes tui infideles,\n socii furum.\n Omnes diligunt munera,\n sequuntur retributiones.\n Pupillo non judicant,\n et causa vidu\u00e6 non ingreditur ad illos.\n24\u00a0Propter hoc ait Dominus,\n Deus exercituum, Fortis Isra\u00ebl:\n Heu! consolabor super hostibus meis,\n et vindicabor de inimicis meis.\n25\u00a0Et convertam manum meam ad te,\n et excoquam ad puram scoriam tuam,\n et auferam omne stannum tuum.\n26\u00a0Et restituam judices tuos ut fuerunt prius,\n et consiliarios tuos sicut antiquitus;\n post h\u00e6c vocaberis civitas justi,\n urbs fidelis.\n27\u00a0Sion in judicio redimetur,\n et reducent eam in justitia.\n28\u00a0Et conteret scelestos, et peccatores simul;\n et qui dereliquerunt Dominum consumentur.\n29\u00a0Confundentur enim ab idolis quibus sacrificaverunt,\n et erubescetis super hortis quos elegeratis,\n30\u00a0cum fueritis velut quercus defluentibus foliis,\n et velut hortus absque aqua.\n31\u00a0Et erit fortitudo vestra ut favilla stupp\u00e6,\n et opus vestrum quasi scintilla,\n et succendetur utrumque simul,\n et non erit qui extinguat.]","title":"Vulgate: Isaiah: Isaiah Chapter 1","type":"page"}