{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa004.htm","path":"bib/vul/isa004.htm","source_url":"https://sacred-texts.com/bib/vul/isa004.htm","text":"1\u00a0[Et apprehendent septem mulieres virum unum in die illa, dicentes:\n Panem nostrum comedemus,\n et vestimentis nostris operiemur:\n tantummodo invocetur nomen tuum super nos;\n aufer opprobrium nostrum.]\n2\u00a0[In die illa,\n erit germen Domini in magnificentia et gloria,\n et fructus terr\u00e6 sublimis, et exsultatio\n his qui salvati fuerint de Isra\u00ebl.\n3\u00a0Et erit: omnis qui relictus fuerit in Sion,\n et residuus in Jerusalem,\n Sanctus vocabitur,\n omnis qui scriptus est in vita in Jerusalem.\n4\u00a0Si abluerit Dominus sordes filiarum Sion,\n et sanguinem Jerusalem laverit de medio ejus,\n in spiritu judicii, et spiritu ardoris.\n5\u00a0Et creabit Dominus super omnem locum montis Sion,\n et ubi invocatus est,\n nubem per diem et fumum,\n et splendorem ignis flammantis in nocte:\n super omnem enim gloriam protectio.\n6\u00a0Et tabernaculum erit in umbraculum,\n diei ab \u00e6stu,\n et in securitatem et absconsionem\n a turbine et a pluvia.]","title":"Vulgate: Isaiah: Isaiah Chapter 4","type":"page"}