{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa006.htm","path":"bib/vul/isa006.htm","source_url":"https://sacred-texts.com/bib/vul/isa006.htm","text":"1 In anno quo mortuus est rex Ozias, vidi Dominum sedentem super solium excelsum et elevatum; et ea qu\u00e6 sub ipso erant replebant templum.\n2 Seraphim stabant super illud: sex al\u00e6 uni, et sex al\u00e6 alteri; duabus velabant faciem ejus, et duabus velabant pedes ejus, et duabus volabant.\n3\u00a0Et clamabant alter ad alterum, et dicebant: [Sanctus, sanctus, sanctus Dominus, Deus exercituum;\n plena est omnis terra gloria ejus.]\n4 Et commota sunt superliminaria cardinum a voce clamantis, et domus repleta est fumo.\n5\u00a0Et dixi: [V\u00e6 mihi, quia tacui,\n quia vir pollutus labiis ego sum,\n et in medio populi polluta labia habentis ego habito,\n et regem Dominum exercituum vidi oculis meis.]\n6 Et volavit ad me unus de seraphim, et in manu ejus calculus, quem forcipe tulerat de altari,\n7\u00a0et tetigit os meum, et dixit: [Ecce tetigit hoc labia tua,\n et auferetur iniquitas tua, et peccatum tuum mundabitur.]\n8\u00a0Et audivi vocem Domini dicentis: [Quem mittam?\n et quis ibit nobis?] Et dixi: [Ecce ego, mitte me.]\n9\u00a0Et dixit: [Vade, et dices populo huic:\n Audite audientes, et nolite intelligere;\n et videte visionem, et nolite cognoscere.\n10\u00a0Exc\u00e6ca cor populi hujus,\n et aures ejus aggrava,\n et oculos ejus claude:\n ne forte videat oculis suis,\n et auribus suis audiat,\n et corde suo intelligat,\n et convertatur, et sanem eum.]\n11\u00a0Et dixi: [Usquequo, Domine?] Et dixit: [Donec desolentur civitates absque habitatore,\n et domus sine homine,\n et terra relinquetur deserta.\n12\u00a0Et longe faciet Dominus homines,\n et multiplicabitur qu\u00e6 derelicta fuerat in medio terr\u00e6.\n13\u00a0Et adhuc in ea decimatio,\n et convertetur, et erit in ostensionem\n sicut terebinthus, et sicut quercus qu\u00e6 expandit ramos suos;\n semen sanctum erit id quod steterit in ea.]","title":"Vulgate: Isaiah: Isaiah Chapter 6","type":"page"}