{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa007.htm","path":"bib/vul/isa007.htm","source_url":"https://sacred-texts.com/bib/vul/isa007.htm","text":"1 Et factum est in diebus Achaz, filii Joathan, filii Ozi\u00e6, regis Juda, ascendit Rasin, rex Syri\u00e6, et Phacee, filius Romeli\u00e6, rex Isra\u00ebl, in Jerusalem, ad pr\u00e6liandum contra eam: et non potuerunt\n2 debellare eam. Et nuntiaverunt domui David, dicentes: Requievit Syria super Ephraim. Et commotum est cor ejus, et cor populi ejus, sicut moventur ligna silvarum a facie venti.\n3 Et dixit Dominus ad Isaiam: Egredere in occursum Achaz, tu et qui derelictus est Jasub, filius tuus, ad extremum aqu\u00e6ductus piscin\u00e6 superioris in via agri Fullonis;\n4\u00a0et dices ad eum: [Vide ut sileas; noli timere,\n et cor tuum ne formidet\n a duabus caudis titionum fumigantium istorum,\n in ira furoris Rasin, regis Syri\u00e6, et filii Romeli\u00e6;\n5\u00a0eo quod consilium inierit contra te Syria in malum,\n Ephraim, et filius Romeli\u00e6, dicentes:\n6\u00a0Ascendamus ad Judam,\n et suscitemus eum, et avellamus eum ad nos,\n et ponamus regem in medio ejus filium Tabeel.\n7\u00a0H\u00e6c dicit Dominus Deus:\n Non stabit, et non erit istud;\n8\u00a0sed caput Syri\u00e6 Damascus,\n et caput Damasci Rasin;\n et adhuc sexaginta et quinque anni,\n et desinet Ephraim esse populus;\n9\u00a0et caput Ephraim Samaria,\n et caput Samari\u00e6 filius Romeli\u00e6.\n Si non credideritis, non permanebitis.]\n10 Et adjecit Dominus loqui ad Achaz, dicens:\n11 Pete tibi signum a Domino Deo tuo, in profundum inferni, sive in excelsum supra.\n12 Et dixit Achaz: Non petam, et non tentabo Dominum.\n13\u00a0Et dixit: [Audite ergo, domus David.\n Numquid parum vobis est molestos esse hominibus,\n quia molesti estis et Deo meo?\n14\u00a0Propter hoc dabit Dominus ipse vobis signum:\n ecce virgo concipiet, et pariet filium,\n et vocabitur nomen ejus Emmanuel.\n15\u00a0Butyrum et mel comedet,\n ut sciat reprobare malum, et eligere bonum.\n16\u00a0Quia antequam sciat puer reprobare malum et eligere bonum,\n derelinquetur terra quam tu detestaris a facie duorum regum suorum.\n17\u00a0Adducet Dominus super te, et super populum tuum,\n et super domum patris tui,\n dies qui non venerunt\n a diebus separationis Ephraim a Juda,\n cum rege Assyriorum.\n18\u00a0Et erit in die illa: sibilabit Dominus\n musc\u00e6 qu\u00e6 est in extremo fluminum \u00c6gypti,\n et api qu\u00e6 est in terra Assur;\n19\u00a0et venient, et requiescent omnes\n in torrentibus vallium,\n et in cavernis petrarum,\n et in omnibus frutetis, et in universis foraminibus.\n20\u00a0In die illa radet Dominus\n in novacula conducta in his qui trans flumen sunt,\n in rege Assyriorum,\n caput et pilos pedum,\n et barbam universam.\n21\u00a0Et erit in die illa:\n nutriet homo vaccam boum, et duas oves,\n22\u00a0et pr\u00e6 ubertate lactis\n comedet butyrum;\n butyrum enim et mel manducabit\n omnis qui relictus fuerit in medio terr\u00e6.\n23\u00a0Et erit in die illa: omnis locus ubi fuerint\n mille vites, mille argenteis,\n in sinas et in vepres erunt.\n24\u00a0Cum sagittis et arcu ingredientur illuc:\n vepres enim et spin\u00e6 erunt in universa terra.\n25\u00a0Et omnes montes qui in sarculo sarrientur,\n non veniet illuc terror spinarum et veprium:\n et erit in pascua bovis, et in conculcationem pecoris.]","title":"Vulgate: Isaiah: Isaiah Chapter 7","type":"page"}