{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa008.htm","path":"bib/vul/isa008.htm","source_url":"https://sacred-texts.com/bib/vul/isa008.htm","text":"1 Et dixit Dominus ad me: Sume tibi librum grandem, et scribe in eo stylo hominis: Velociter spolia detrahe, cito pr\u00e6dare.\n2 Et adhibui mihi testes fideles, Uriam sacerdotem, et Zachariam, filium Barachi\u00e6:\n3 et accessi ad prophetissam, et concepit, et peperit filium. Et dixit Dominus ad me: Voca nomen ejus: Accelera spolia detrahere; Festina pr\u00e6dari:\n4\u00a0quia antequam sciat puer vocare patrem suum et matrem suam, auferetur fortitudo Damasci, et spolia Samari\u00e6, coram rege Assyriorum.\n \n5 Et adjecit Dominus loqui ad me adhuc, dicens:\n6\u00a0[Pro eo quod abjecit populus iste\n aquas Silo\u00eb, qu\u00e6 vadunt cum silentio,\n et assumpsit magis Rasin,\n et filium Romeli\u00e6:\n7\u00a0propter hoc ecce Dominus adducet super eos\n aquas fluminis fortes et multas,\n regem Assyriorum, et omnem gloriam ejus,\n et ascendet super omnes rivos ejus,\n et fluet super universas ripas ejus;\n8\u00a0et ibit per Judam, inundans, et transiens:\n usque ad collum veniet.\n Et erit extensio alarum ejus\n implens latitudinem terr\u00e6 tu\u00e6, o Emmanuel!\n9\u00a0Congregamini, populi, et vincimini;\n et audite, univers\u00e6 procul terr\u00e6:\n confortamini, et vincimini;\n accingite vos, et vincimini.\n10\u00a0Inite consilium, et dissipabitur;\n loquimini verbum, et non fiet:\n quia nobiscum Deus.\n11\u00a0H\u00e6c enim ait Dominus ad me: Sicut in manu forti erudivit me,\n ne irem in via populi hujus, dicens:\n12\u00a0Non dicatis: Conjuratio;\n omnia enim qu\u00e6 loquitur populus iste, conjuratio est:\n et timorem ejus ne timeatis, neque paveatis.\n13\u00a0Dominum exercituum ipsum sanctificate;\n ipse pavor vester, et ipse terror vester:\n14\u00a0et erit vobis in sanctificationem;\n in lapidem autem offensionis, et in petram scandali,\n duabus domibus Isra\u00ebl;\n in laqueum et in ruinam habitantibus Jerusalem.\n15\u00a0Et offendent ex eis plurimi,\n et cadent, et conterentur,\n et irretientur, et capientur.\n16\u00a0Liga testimonium,\n signa legem in discipulis meis.\n17\u00a0Et exspectabo Dominum qui abscondit faciem suam\n a domo Jacob, et pr\u00e6stolabor eum.\n18\u00a0Ecce ego et pueri mei quos dedit mihi Dominus\n in signum, et in portentum Isra\u00ebl\n a Domino exercituum,\n qui habitat in monte Sion:\n19\u00a0et cum dixerint ad vos:\n Qu\u00e6rite a pythonibus\n et a divinis qui strident in incantationibus suis:\n numquid non populus a Deo suo requiret,\n pro vivis a mortuis?\n20\u00a0ad legem magis et ad testimonium.\n Quod si non dixerint juxta verbum hoc,\n non erit eis matutina lux.\n21\u00a0Et transibit per eam, corruet, et esuriet;\n et cum esurierit, irascetur.\n Et maledicet regi suo, et Deo suo,\n et suscipiet sursum,\n22\u00a0et ad terram intuebitur;\n et ecce tribulatio et tenebr\u00e6,\n dissolutio et angustia,\n et caligo persequens,\n et non poterit avolare de angustia sua.]","title":"Vulgate: Isaiah: Isaiah Chapter 8","type":"page"}