{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa009.htm","path":"bib/vul/isa009.htm","source_url":"https://sacred-texts.com/bib/vul/isa009.htm","text":"1\u00a0[Primo tempore alleviata est\n terra Zabulon et terra Nephthali:\n et novissimo aggravata est via maris\n trans Jordanem Galil\u00e6\u00e6 gentium.\n2\u00a0Populus qui ambulabat in tenebris,\n vidit lucem magnam;\n habitantibus in regione umbr\u00e6 mortis,\n lux orta est eis.\n3\u00a0Multiplicasti gentem,\n et non magnificasti l\u00e6titiam.\n L\u00e6tabuntur coram te, sicut qui l\u00e6tantur in messe;\n sicut exsultant victores capta pr\u00e6da, quando dividunt spolia.\n4\u00a0Jugum enim oneris ejus,\n et virgam humeri ejus,\n et sceptrum exactoris ejus\n superasti, sicut in die Madian.\n5\u00a0Quia omnis violentia pr\u00e6datio cum tumultu,\n et vestimentum mistum sanguine,\n erit in combustionem,\n et cibus ignis.\n6\u00a0Parvulus enim natus est nobis,\n et filius datus est nobis,\n et factus est principatus super humerum ejus:\n et vocabitur nomen ejus,\n Admirabilis, Consiliarius, Deus, Fortis,\n Pater futuri s\u00e6culi, Princeps pacis.\n7\u00a0Multiplicabitur ejus imperium,\n et pacis non erit finis;\n super solium David, et super regnum ejus sedebit,\n ut confirmet illud et corroboret\n in judicio et justitia,\n amodo usque in sempiternum:\n zelus Domini exercituum faciet hoc.]\n \n8\u00a0[Verbum misit Dominus in Jacob,\n et cecidit in Isra\u00ebl.\n9\u00a0Et sciet omnis populus Ephraim,\n et habitantes Samariam,\n in superbia et magnitudine cordis dicentes:\n10\u00a0Lateres ceciderunt, sed quadris lapidibus \u00e6dificabimus;\n sycomoros succiderunt, sed cedros immutabimus.\n11\u00a0Et elevabit Dominus hostes Rasin super eum,\n et inimicos ejus in tumultum vertet.\n12\u00a0Syriam ab oriente, et Philisthiim ab occidente;\n et devorabunt Isra\u00ebl toto ore.\n In omnibus his non est aversus furor ejus,\n sed adhuc manus ejus extenta.\n13\u00a0Et populus non est reversus ad percutientem se,\n et Dominum exercituum non inquisierunt.\n14\u00a0Et disperdet Dominus ab Isra\u00ebl caput et caudam,\n incurvantem et refrenantem, die una.\n15\u00a0Long\u00e6vus et honorabilis, ipse est caput;\n et propheta docens mendacium, ipse est cauda.\n16\u00a0Et erunt qui beatificant populum istum, seducentes;\n et qui beatificantur, pr\u00e6cipitati.\n17\u00a0Propter hoc super adolescentulis ejus non l\u00e6tabitur Dominus,\n et pupillorum ejus et viduarum non miserebitur:\n quia omnis hypocrita est et nequam,\n et universum os locutum est stultitiam;\n in omnibus his non est aversus furor ejus,\n sed adhuc manus ejus extenta.\n18\u00a0Succensa est enim quasi ignis impietas:\n veprem et spinam vorabit,\n et succendetur in densitate saltus,\n et convolvetur superbia fumi.\n19\u00a0In ira Domini exercituum conturbata est terra,\n et erit populus quasi esca ignis;\n vir fratri suo non parcet.\n20\u00a0Et declinabit ad dexteram, et esuriet;\n et comedet ad sinistram, et non saturabitur;\n unusquisque carnem brachii sui vorabit:\n Manasses Ephraim, et Ephraim Manassen;\n simul ipsi contra Judam.\n21\u00a0In omnibus his non est aversus furor ejus,\n sed adhuc manus ejus extenta.]","title":"Vulgate: Isaiah: Isaiah Chapter 9","type":"page"}