{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa010.htm","path":"bib/vul/isa010.htm","source_url":"https://sacred-texts.com/bib/vul/isa010.htm","text":"1\u00a0[V\u00e6 qui condunt leges iniquas,\n et scribentes injustitiam scripserunt,\n2\u00a0ut opprimerent in judicio pauperes,\n et vim facerent caus\u00e6 humilium populi mei;\n ut essent vidu\u00e6 pr\u00e6da eorum,\n et pupillos diriperent.\n3\u00a0Quid facietis in die visitationis,\n et calamitatis de longe venientis?\n ad cujus confugietis auxilium?\n et ubi derelinquetis gloriam vestram,\n4\u00a0ne incurvemini sub vinculo,\n et cum interfectis cadatis?\n Super omnibus his non est aversus furor ejus,\n sed adhuc manus ejus extenta.]\n \n5\u00a0[V\u00e6 Assur! virga furoris mei et baculus ipse est;\n in manu eorum indignatio mea.\n6\u00a0Ad gentem fallacem mittam eum,\n et contra populum furoris mei mandabo illi,\n ut auferat spolia, et diripiat pr\u00e6dam,\n et ponat illum in conculcationem quasi lutum platearum.\n7\u00a0Ipse autem non sic arbitrabitur,\n et cor ejus non ita existimabit;\n sed ad conterendum erit cor ejus,\n et ad internecionem gentium non paucarum.\n8 Dicet enim:\n9\u00a0Numquid non principes mei simul reges sunt?\n numquid non ut Charcamis, sic Calano?\n et ut Arphad, sic Emath?\n numquid non ut Damascus, sic Samaria?\n10\u00a0Quomodo invenit manus mea regna idoli,\n sic et simulacra eorum de Jerusalem et de Samaria.\n11\u00a0Numquid non sicut feci Samari\u00e6 et idolis ejus,\n sic faciam Jerusalem et simulacris ejus?\n12\u00a0Et erit, cum impleverit Dominus\n cuncta opera sua\n in monte Sion et in Jerusalem,\n visitabo super fructum magnifici cordis regis Assur,\n et super gloriam altitudinis oculorum ejus.\n13\u00a0Dixit enim: In fortitudine manus me\u00e6 feci,\n et in sapientia mea intellexi;\n et abstuli terminos populorum,\n et principes eorum depr\u00e6datus sum,\n et detraxi quasi potens in sublimi residentes.\n14\u00a0Et invenit quasi nidum manus mea\n fortitudinem populorum;\n et sicut colliguntur ova qu\u00e6 derelicta sunt,\n sic universam terram ego congregavi;\n et non fuit qui moveret pennam,\n et aperiret os, et ganniret.\n15\u00a0Numquid gloriabitur securis contra eum qui secat in ea?\n aut exaltabitur serra contra eum a quo trahitur?\n Quomodo si elevetur virga contra elevantem se,\n et exaltetur baculus, qui utique lignum est.\n16\u00a0Propter hoc mittet Dominator, Dominus exercituum,\n in pinguibus ejus tenuitatem;\n et subtus gloriam ejus succensa ardebit\n quasi combustio ignis.\n17\u00a0Et erit lumen Isra\u00ebl in igne,\n et Sanctus ejus in flamma;\n et succendetur, et devorabitur\n spina ejus et vepres in die una.\n18\u00a0Et gloria saltus ejus, et carmeli ejus,\n ab anima usque ad carnem consumetur;\n et erit terrore profugus.\n19\u00a0Et reliqui\u00e6 ligni saltus ejus pr\u00e6 paucitate numerabuntur,\n et puer scribet eos.]\n \n20\u00a0[Et erit in die illa:\n non adjiciet residuum Isra\u00ebl,\n et hi qui fugerint de domo Jacob,\n inniti super eo qui percutit eos;\n sed innitetur super Dominum,\n Sanctum Isra\u00ebl, in veritate.\n21\u00a0Reliqui\u00e6 convertentur; reliqui\u00e6, inquam, Jacob\n ad Deum fortem.\n22\u00a0Si enim fuerit populus tuus, Isra\u00ebl, quasi arena maris,\n reliqui\u00e6 convertentur ex eo;\n consummatio abbreviata\n inundabit justitiam.\n23\u00a0Consummationem enim et abbreviationem\n Dominus Deus exercituum faciet in medio omnis terr\u00e6.\n24\u00a0Propter hoc, h\u00e6c dicit Dominus Deus exercituum:\n Noli timere, populus meus,\n habitator Sion, ab Assur:\n in virga percutiet te,\n et baculum suum levabit super te,\n in via \u00c6gypti.\n25\u00a0Adhuc enim paululum modicumque,\n et consummabitur indignatio\n et furor meus super scelus eorum.\n26\u00a0Et suscitabit super eum Dominus exercituum flagellum,\n juxta plagam Madian in petra Oreb:\n et virgam suam super mare,\n et levabit eam in via \u00c6gypti.\n27\u00a0Et erit in die illa:\n auferetur onus ejus de humero tuo\n et jugum ejus de collo tuo,\n et computrescet jugum a facie olei.]\n \n28\u00a0[Veniet in Ajath, transibit in Magron,\n apud Machmas commendabit vasa sua.\n29\u00a0Transierunt cursim,\n Gaba sedes nostra;\n obstupuit Rama,\n Gabaath Saulis fugit.\n30\u00a0Hinni voce tua, filia Gallim,\n attende Laisa, paupercula Anathoth.\n31\u00a0Migravit Medemena;\n habitatores Gabim, confortamini.\n32\u00a0Adhuc dies est ut in Nobe stetur;\n agitabit manum suam super montem fili\u00e6 Sion,\n collem Jerusalem.\n33\u00a0Ecce Dominator, Dominus exercituum,\n confringet lagunculam in terrore;\n et excelsi statura succidentur,\n et sublimes humiliabuntur.\n34\u00a0Et subvertentur condensa saltus ferro;\n et Libanus cum excelsis cadet.]","title":"Vulgate: Isaiah: Isaiah Chapter 10","type":"page"}