{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa011.htm","path":"bib/vul/isa011.htm","source_url":"https://sacred-texts.com/bib/vul/isa011.htm","text":"1\u00a0[Et egredietur virga de radice Jesse,\n et flos de radice ejus ascendet.\n2\u00a0Et requiescet super eum spiritus Domini:\n spiritus sapienti\u00e6 et intellectus,\n spiritus consilii et fortitudinis,\n spiritus scienti\u00e6 et pietatis;\n3\u00a0et replebit eum spiritus timoris Domini.\n Non secundum visionem oculorum judicabit,\n neque secundum auditum aurium arguet;\n4\u00a0sed judicabit in justitia pauperes,\n et arguet in \u00e6quitate pro mansuetis terr\u00e6;\n et percutiet terram virga oris sui,\n et spiritu labiorum suorum interficiet impium.\n5\u00a0Et erit justitia cingulum lumborum ejus,\n et fides cinctorium renum ejus.\n6\u00a0Habitabit lupus cum agno,\n et pardus cum h\u00e6do accubabit;\n vitulus, et leo, et ovis, simul morabuntur,\n et puer parvulus minabit eos.\n7\u00a0Vitulus et ursus pascentur,\n simul requiescent catuli eorum;\n et leo quasi bos comedet paleas.\n8\u00a0Et delectabitur infans ab ubere super foramine aspidis;\n et in caverna reguli\n qui ablactatus fuerit manum suam mittet.\n9\u00a0Non nocebunt, et non occident\n in universo monte sancto meo,\n quia repleta est terra scientia Domini, sicut aqu\u00e6 maris operientes.]\n \n10\u00a0[In die illa radix Jesse,\n qui stat in signum populorum,\n ipsum gentes deprecabuntur,\n et erit sepulchrum ejus gloriosum.\n11\u00a0Et erit in die illa: adjiciet Dominus secundo manum suam\n ad possidendum residuum populi sui,\n quod relinquetur ab Assyriis, et ab \u00c6gypto,\n et a Phetros, et ab \u00c6thiopia, et ab \u00c6lam, et a Sennaar,\n et ab Emath, et ab insulis maris.\n12\u00a0Et levabit signum in nationes,\n et congregabit profugos Isra\u00ebl,\n et dispersos Juda colliget\n a quatuor plagis terr\u00e6.\n13\u00a0Et auferetur zelus Ephraim,\n et hostes Juda peribunt;\n Ephraim non \u00e6mulabitur Judam,\n et Judas non pugnabit contra Ephraim.\n14\u00a0Et volabunt in humeros Philisthiim per mare,\n simul pr\u00e6dabuntur filios orientis;\n Idum\u00e6a et Moab pr\u00e6ceptum manus eorum,\n et filii Ammon obedientes erunt.\n15\u00a0Et desolabit Dominus linguam maris \u00c6gypti,\n et levabit manum suam super flumen in fortitudine spiritus sui;\n et percutiet eum in septem rivis,\n ita ut transeant per eum calceati.\n16\u00a0Et erit via residuo populo meo\n qui relinquetur ab Assyriis,\n sicut fuit Isra\u00ebli\n in die illa qua ascendit de terra \u00c6gypti.]","title":"Vulgate: Isaiah: Isaiah Chapter 11","type":"page"}