{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa013.htm","path":"bib/vul/isa013.htm","source_url":"https://sacred-texts.com/bib/vul/isa013.htm","text":"1 Onus Babylonis, quod vidit Isaias, filius Amos.\n2\u00a0[Super montem caliginosum levate signum:\n exaltate vocem,\n levate manum,\n et ingrediantur portas duces.\n3\u00a0Ego mandavi sanctificatis meis,\n et vocavi fortes meos in ira mea,\n exsultantes in gloria mea.\n4\u00a0Vox multitudinis in montibus,\n quasi populorum frequentium;\n vox sonitus regum,\n gentium congregatarum.\n Dominus exercituum pr\u00e6cepit\n militi\u00e6 belli,\n5\u00a0venientibus de terra procul,\n a summitate c\u00e6li;\n Dominus, et vasa furoris ejus,\n ut disperdat omnem terram.\n6\u00a0Ululate, quia prope est dies Domini;\n quasi vastitas a Domino veniet.\n7\u00a0Propter hoc omnes manus dissolventur,\n et omne cor hominis contabescet,\n8\u00a0et conteretur.\n Torsiones et dolores tenebunt;\n quasi parturiens dolebunt:\n unusquisque ad proximum suum stupebit,\n facies combust\u00e6 vultus eorum.\n9\u00a0Ecce dies Domini veniet,\n crudelis, et indignationis plenus, et ir\u00e6, furorisque,\n ad ponendam terram in solitudinem,\n et peccatores ejus conterendos de ea.\n10\u00a0Quoniam stell\u00e6 c\u00e6li, et splendor earum,\n non expandent lumen suum;\n obtenebratus est sol in ortu suo,\n et luna non splendebit in lumine suo.\n11\u00a0Et visitabo super orbis mala,\n et contra impios iniquitatem eorum;\n et quiescere faciam superbiam infidelium,\n et arrogantiam fortium humiliabo.\n12\u00a0Pretiosior erit vir auro,\n et homo mundo obrizo.\n13\u00a0Super hoc c\u00e6lum turbabo;\n et movebitur terra de loco suo,\n propter indignationem Domini exercituum,\n et propter diem ir\u00e6 furoris ejus.\n14\u00a0Et erit quasi damula fugiens,\n et quasi ovis, et non erit qui congreget.\n Unusquisque ad populum suum convertetur,\n et singuli ad terram suam fugient.\n15\u00a0Omnis qui inventus fuerit occidetur,\n et omnis qui supervenerit cadet in gladio;\n16\u00a0infantes eorum allidentur in oculis eorum,\n diripientur domus eorum, et uxores eorum violabuntur.\n17\u00a0Ecce ego suscitabo super eos Medos,\n qui argentum non qu\u00e6rant,\n nec aurum velint;\n18\u00a0sed sagittis parvulos interficient,\n et lactantibus uteris non miserebuntur,\n et super filios non parcet oculus eorum.\n19\u00a0Et erit Babylon illa gloriosa in regnis,\n inclyta superbia Chald\u00e6orum,\n sicut subvertit Dominus Sodomam et Gomorrham.\n20\u00a0Non habitabitur usque in finem,\n et non fundabitur usque ad generationem et generationem;\n nec ponet tibi tentoria Arabs,\n nec pastores requiescent ibi.\n21\u00a0Sed requiescent ibi besti\u00e6,\n et replebuntur domus eorum draconibus,\n et habitabunt ibi struthiones,\n et pilosi saltabunt ibi;\n22\u00a0et respondebunt ibi ulul\u00e6 in \u00e6dibus ejus,\n et sirenes in delubris voluptatis.]","title":"Vulgate: Isaiah: Isaiah Chapter 13","type":"page"}