{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa014.htm","path":"bib/vul/isa014.htm","source_url":"https://sacred-texts.com/bib/vul/isa014.htm","text":"1\u00a0[Prope est ut veniat tempus ejus,\n et dies ejus non elongabuntur.\n Miserebitur enim Dominus Jacob,\n et eliget adhuc de Isra\u00ebl,\n et requiescere eos faciet super humum suam;\n adjungetur advena ad eos,\n et adh\u00e6rebit domui Jacob.\n2\u00a0Et tenebunt eos populi,\n et adducent eos in locum suum;\n et possidebit eos domus Isra\u00ebl\n super terram Domini\n in servos et ancillas:\n et erunt capientes eos qui se ceperant,\n et subjicient exactores suos.]\n \n3\u00a0[Et erit in die illa: cum requiem dederit tibi Deus\n a labore tuo, et a concussione tua,\n et a servitute dura qua ante servisti,\n4\u00a0sumes parabolam istam\n contra regem Babylonis, et dices:\n Quomodo cessavit exactor;\n quievit tributum?\n5\u00a0Contrivit Dominus baculum impiorum,\n virgam dominantium,\n6\u00a0c\u00e6dentem populos in indignatione\n plaga insanabili,\n subjicientem in furore gentes,\n persequentem crudeliter.\n7\u00a0Conquievit et siluit omnis terra,\n gavisa est et exsultavit;\n8\u00a0abietes quoque l\u00e6tat\u00e6 sunt super te,\n et cedri Libani:\n ex quo dormisti, non ascendet\n qui succidat nos.\n9\u00a0Infernus subter conturbatus est\n in occursum adventus tui;\n suscitavit tibi gigantes.\n Omnes principes terr\u00e6\n surrexerunt de soliis suis,\n omnes principes nationum.\n10\u00a0Universi respondebunt, et dicent tibi:\n Et tu vulneratus es sicut et nos;\n nostri similis effectus es.\n11\u00a0Detracta est ad inferos superbia tua,\n concidit cadaver tuum;\n subter te sternetur tinea,\n et operimentum tuum erunt vermes.\n12\u00a0Quomodo cecidisti de c\u00e6lo,\n Lucifer, qui mane oriebaris?\n corruisti in terram,\n qui vulnerabas gentes?\n13\u00a0Qui dicebas in corde tuo:\n In c\u00e6lum conscendam,\n super astra Dei\n exaltabo solium meum;\n sedebo in monte testamenti,\n in lateribus aquilonis;\n14\u00a0ascendam super altitudinem nubium,\n similis ero Altissimo?\n15\u00a0Verumtamen ad infernum detraheris,\n in profundum laci.\n16\u00a0Qui te viderint, ad te inclinabuntur,\n teque prospicient:\n Numquid iste est vir qui conturbavit terram,\n qui concussit regna,\n17\u00a0qui posuit orbem desertum,\n et urbes ejus destruxit,\n vinctis ejus non aperuit carcerem?\n18\u00a0Omnes reges gentium\n universi dormierunt in gloria,\n vir in domo sua;\n19\u00a0tu autem projectus es de sepulchro tuo,\n quasi stirps inutilis pollutus,\n et obvolutus cum his qui interfecti sunt gladio,\n et descenderunt ad fundamenta laci,\n quasi cadaver putridum.\n20\u00a0Non habebis consortium, neque cum eis in sepultura;\n tu enim terram tuam disperdidisti,\n tu populum tuum occidisti:\n non vocabitur in \u00e6ternum\n semen pessimorum.\n21\u00a0Pr\u00e6parate filios ejus occisioni,\n in iniquitate patrum suorum:\n non consurgent, nec h\u00e6reditabunt terram,\n neque implebunt faciem orbis civitatum.\n22\u00a0Et consurgam super eos,\n dicit Dominus exercituum;\n et perdam Babylonis nomen, et reliquias,\n et germen, et progeniem, dicit Dominus;\n23\u00a0et ponam eam in possessionem ericii,\n et in paludes aquarum,\n et scopabo eam in scopa terens,\n dicit Dominus exercituum.]\n \n24\u00a0[Juravit Dominus exercituum, dicens:\n Si non, ut putavi, ita erit;\n et quomodo mente tractavi,\n25\u00a0sic eveniet:\n ut conteram Assyrium in terra mea,\n et in montibus meis conculcem eum;\n et auferetur ab eis jugum ejus,\n et onus illius ab humero eorum tolletur.\n26\u00a0Hoc consilium quod cogitavi super omnem terram;\n et h\u00e6c est manus extenta super universas gentes.\n27\u00a0Dominus enim exercituum decrevit; et quis poterit infirmare?\n et manus ejus extenta; et quis avertet eam?]\n \n28 In anno quo mortuus est rex Achaz, factum est onus istud:\n29\u00a0[Ne l\u00e6taris, Philisth\u00e6a omnis tu,\n quoniam comminuta est virga percussoris tui;\n de radice enim colubri egredietur regulus,\n et semen ejus absorbens volucrem.\n30\u00a0Et pascentur primogeniti pauperum,\n et pauperes fiducialiter requiescent;\n et interire faciam in fame radicem tuam,\n et reliquias tuas interficiam.\n31\u00a0Ulula, porta; clama civitas;\n prostrata est Philisth\u00e6a omnis;\n ab aquilone enim fumus veniet,\n et non est qui effugiet agmen ejus.\n32\u00a0Et quid respondebitur nuntiis gentis?\n Quia Dominus fundavit Sion,\n et in ipso sperabunt pauperes populi ejus.]","title":"Vulgate: Isaiah: Isaiah Chapter 14","type":"page"}