{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa018.htm","path":"bib/vul/isa018.htm","source_url":"https://sacred-texts.com/bib/vul/isa018.htm","text":"1\u00a0[V\u00e6 terr\u00e6 cymbalo alarum,\n qu\u00e6 est trans flumina \u00c6thiopi\u00e6,\n2\u00a0qui mittit in mare legatos,\n et in vasis papyri super aquas.\n Ite, angeli veloces,\n ad gentem convulsam et dilaceratam;\n ad populum terribilem, post quem non est alius;\n ad gentem exspectantem et conculcatam,\n cujus diripuerunt flumina terram ejus.\n3\u00a0Omnes habitatores orbis, qui moramini in terra, cum elevatum fuerit signum in montibus, videbitis,\n et clangorem tub\u00e6 audietis.\n4\u00a0Quia h\u00e6c dicit Dominus ad me:\n Quiescam et considerabo in loco meo,\n sicut meridiana lux clara est,\n et sicut nubes roris in die messis.\n5\u00a0Ante messem enim totus effloruit,\n et immatura perfectio germinabit;\n et pr\u00e6cidentur ramusculi ejus falcibus,\n et qu\u00e6 derelicta fuerint abscindentur et excutientur.\n6\u00a0Et relinquentur simul avibus montium\n et bestiis terr\u00e6;\n et \u00e6state perpetua erunt super eum volucres,\n et omnes besti\u00e6 terr\u00e6 super illum hiemabunt.\n7\u00a0In tempore illo deferetur munus Domino exercituum\n a populo divulso et dilacerato,\n a populo terribili, post quem non fuit alius;\n a gente exspectante, exspectante et conculcata,\n cujus diripuerunt flumina terram ejus;\n ad locum nominis Domini exercituum, montem Sion.]","title":"Vulgate: Isaiah: Isaiah Chapter 18","type":"page"}