{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa019.htm","path":"bib/vul/isa019.htm","source_url":"https://sacred-texts.com/bib/vul/isa019.htm","text":"1\u00a0Onus \u00c6gypti. [Ecce Dominus ascendet super nubem levem,\n et ingredietur \u00c6gyptum,\n et commovebuntur simulacra \u00c6gypti a facie ejus,\n et cor \u00c6gypti tabescet in medio ejus,\n2\u00a0et concurrere faciam \u00c6gyptios adversus \u00c6gyptios;\n et pugnabit vir contra fratrem suum, et vir contra amicum suum,\n civitas adversus civitatem, regnum adversus regnum.\n3\u00a0Et dirumpetur spiritus \u00c6gypti in visceribus ejus,\n et consilium ejus pr\u00e6cipitabo;\n et interrogabunt simulacra sua, et divinos suos,\n et pythones, et ariolos.\n4\u00a0Et tradam \u00c6gyptum in manu dominorum crudelium,\n et rex fortis dominabitur eorum,\n ait Dominus Deus exercituum.\n5\u00a0Et arescet aqua de mari,\n et fluvius desolabitur atque siccabitur.\n6\u00a0Et deficient flumina,\n attenuabuntur et siccabuntur rivi aggerum,\n calamus et juncus marcescet.\n7\u00a0Nudabitur alveus rivi a fonte suo,\n et omnis sementis irrigua\n siccabitur, arescet, et non erit.\n8\u00a0Et m\u0153rebunt piscatores,\n et lugebunt omnes mittentes in flumen hamum;\n et expandentes rete super faciem aquarum emarcescent.\n9\u00a0Confundentur qui operabantur linum,\n pectentes et texentes subtilia.\n10\u00a0Et erunt irrigua ejus flaccentia:\n omnes qui faciebant lacunas ad capiendos pisces.\n11\u00a0Stulti principes Taneos,\n sapientes consiliarii Pharaonis\n dederunt consilium insipiens.\n Quomodo dicetis Pharaoni:\n Filius sapientium ego,\n filius regum antiquorum?\n12\u00a0Ubi nunc sunt sapientes tui?\n annuntient tibi, et indicent\n quid cogitaverit Dominus exercituum super \u00c6gyptum.\n13\u00a0Stulti facti sunt principes Taneos,\n emarcuerunt principes Mempheos;\n deceperunt \u00c6gyptum, angulum populorum ejus.\n14\u00a0Dominus miscuit in medio ejus spiritum vertiginis;\n et errare fecerunt \u00c6gyptum in omni opere suo,\n sicut errat ebrius et vomens.\n15\u00a0Et non erit \u00c6gypto opus\n quod faciat caput et caudam,\n incurvantem et refrenantem.\n16\u00a0In die illa erit \u00c6gyptus quasi mulieres;\n et stupebunt, et timebunt\n a facie commotionis manus Domini exercituum,\n quam ipse movebit super eam.\n17\u00a0Et erit terra Juda\n \u00c6gypto in pavorem;\n omnis qui illius fuerit recordatus pavebit\n a facie consilii Domini exercituum,\n quod ipse cogitavit super eam.\n18\u00a0In die illa erunt quinque civitates\n in terra \u00c6gypti\n loquentes lingua Chanaan,\n et jurantes per Dominum exercituum:\n Civitas solis vocabitur una.\n19\u00a0In die illa erit altare Domini\n in medio terr\u00e6 \u00c6gypti,\n et titulus Domini juxta terminum ejus.\n20\u00a0Erit in signum et in testimonium Domino exercituum\n in terra \u00c6gypti;\n clamabunt enim ad Dominum a facie tribulationis,\n et mittet eis salvatorem\n et propugnatorem qui liberet eos.\n21\u00a0Et cognoscetur Dominus ab \u00c6gypto,\n et cognoscent \u00c6gyptii Dominum\n in die illa;\n et colent eum in hostiis et in muneribus;\n et vota vovebunt Domino, et solvent.\n22\u00a0Et percutiet Dominus \u00c6gyptum plaga,\n et sanabit eam;\n et revertentur ad Dominum,\n et placabitur eis, et sanabit eos.\n23\u00a0In die illa erit via\n de \u00c6gypto in Assyrios;\n et intrabit Assyrius \u00c6gyptum,\n et \u00c6gyptius in Assyrios,\n et servient \u00c6gyptii Assur.\n24\u00a0In die illa erit Isra\u00ebl tertius\n \u00c6gyptio et Assyrio;\n benedictio in medio terr\u00e6\n25\u00a0cui benedixit Dominus exercituum, dicens:\n Benedictus populus meus \u00c6gypti,\n et opus manuum mearum Assyrio;\n h\u00e6reditas autem mea Isra\u00ebl.]","title":"Vulgate: Isaiah: Isaiah Chapter 19","type":"page"}