{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa023.htm","path":"bib/vul/isa023.htm","source_url":"https://sacred-texts.com/bib/vul/isa023.htm","text":"1\u00a0Onus Tyri. [Ululate, naves maris,\n quia vastata est domus\n unde venire consueverant:\n de terra Cethim\n revelatum est eis.\n2\u00a0Tacete, qui habitatis in insula;\n negotiatores Sidonis, transfretantes mare, repleverunt te.\n3\u00a0In aquis multis semen Nili;\n messis fluminis fruges ejus:\n et facta est negotiatio gentium.\n4\u00a0Erubesce, Sidon; ait enim mare,\n fortitudo maris, dicens:\n Non parturivi, et non peperi,\n et non enutrivi juvenes,\n nec ad incrementum perduxi virgines.\n5\u00a0Cum auditum fuerit in \u00c6gypto,\n dolebunt cum audierint de Tiro.\n6\u00a0Transite maria, ululate,\n qui habitatis in insula!\n7\u00a0Numquid non vestra h\u00e6c est, qu\u00e6 gloriabatur\n a diebus pristinis in antiquitate sua?\n Ducent eam pedes sui\n longe ad peregrinandum.\n8\u00a0Quis cogitavit hoc\n super Tyrum quondam coronatam,\n cujus negotiatores principes,\n institores ejus inclyti terr\u00e6?\n9\u00a0Dominus exercituum cogitavit hoc,\n ut detraheret superbiam omnis glori\u00e6,\n et ad ignominiam deduceret universos inclytos terr\u00e6.\n10\u00a0Transi terram tuam quasi flumen, filia maris!\n non est cingulum ultra tibi.\n11\u00a0Manum suam extendit super mare;\n conturbavit regna.\n Dominus mandavit adversus Chanaan,\n ut contereret fortes ejus;\n12\u00a0et dixit: Non adjicies ultra ut glorieris,\n calumniam sustinens virgo filia Sidonis:\n in Cethim consurgens transfreta:\n ibi quoque non erit requies tibi.\n13\u00a0Ecce terra Chald\u00e6orum, talis populus non fuit:\n Assur fundavit eam;\n in captivitatem traduxerunt robustos ejus,\n suffoderunt domos ejus,\n posuerunt eam in ruinam.\n14\u00a0Ululate, naves maris,\n quia devastata est fortitudo vestra.]\n15 Et erit in die illa: in oblivione eris, o Tyre! septuaginta annis, sicut dies regis unius; post septuaginta autem annos erit Tyro quasi canticum meretricis:\n16\u00a0[Sume citharam, circui civitatem,\n meretrix oblivioni tradita:\n bene cane, frequenta canticum,\n ut memoria tui sit.\n17\u00a0Et erit post septuaginta annos:\n visitabit Dominus Tyrum,\n et reducet eam ad mercedes suas,\n et rursum fornicabitur cum universis regnis terr\u00e6\n super faciem terr\u00e6;\n18\u00a0et erunt negotiationes ejus et mercedes ejus sanctificat\u00e6 Domino:\n non condentur neque reponentur,\n quia his qui habitaverint coram Domino erit negotiatio ejus,\n ut manducent in saturitatem, et vestiantur usque ad vetustatem.]","title":"Vulgate: Isaiah: Isaiah Chapter 23","type":"page"}