{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa025.htm","path":"bib/vul/isa025.htm","source_url":"https://sacred-texts.com/bib/vul/isa025.htm","text":"1\u00a0[Domine, Deus meus es tu;\n exaltabo te, et confitebor nomini tuo:\n quoniam fecisti mirabilia,\n cogitationes antiquas fideles. Amen.\n2\u00a0Quia posuisti civitatem in tumulum,\n urbem fortem in ruinam, domum alienorum:\n ut non sit civitas,\n et in sempiternum non \u00e6dificetur.\n3\u00a0Super hoc laudabit te populus fortis;\n civitas gentium robustarum timebit te:\n4\u00a0quia factus es fortitudo pauperi,\n fortitudo egeno in tribulatione sua,\n spes a turbine,\n umbraculum ab \u00e6stu;\n spiritus enim robustorum\n quasi turbo impellens parietem.\n5\u00a0Sicut \u00e6stus in siti,\n tumultum alienorum humiliabis;\n et quasi calore sub nube torrente,\n propaginem fortium marcescere facies.\n6\u00a0Et faciet Dominus exercituum\n omnibus populis in monte hoc\n convivium pinguium,\n convivium vindemi\u00e6,\n pinguium medullatorum,\n vindemi\u00e6 def\u00e6cat\u00e6.\n7\u00a0Et pr\u00e6cipitabit in monte isto\n faciem vinculi colligati super omnes populos,\n et telam quam orditus est super omnes nationes.\n8\u00a0Pr\u00e6cipitabit mortem in sempiternum;\n et auferet Dominus Deus\n lacrimam ab omni facie,\n et opprobrium populi sui auferet\n de universa terra:\n quia Dominus locutus est.]\n \n9\u00a0[Et dicet in die illa:\n Ecce Deus noster iste;\n exspectavimus eum, et salvabit nos;\n iste Dominus, sustinuimus eum:\n exsultabimus, et l\u00e6tabimur in salutari ejus.\n10\u00a0Quia requiescet manus Domini\n in monte isto;\n et triturabitur Moab sub eo,\n sicuti teruntur pale\u00e6 in plaustro.\n11\u00a0Et extendet manus suas sub eo\n sicut extendit natans ad natandum;\n et humiliabit gloriam ejus\n cum allisione manuum ejus.\n12\u00a0Et munimenta sublimium murorum tuorum\n concident, et humiliabuntur,\n et detrahentur in terram usque ad pulverem.]","title":"Vulgate: Isaiah: Isaiah Chapter 25","type":"page"}