{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa026.htm","path":"bib/vul/isa026.htm","source_url":"https://sacred-texts.com/bib/vul/isa026.htm","text":"1\u00a0[In die illa cantabitur canticum istud in terra Juda:\n Urbs fortitudinis nostr\u00e6 Sion; salvator ponetur in ea\n murus et antemurale.\n2\u00a0Aperite portas, et ingrediatur gens justa,\n custodiens veritatem.\n3\u00a0Vetus error abiit: servabis pacem;\n pacem, quia in te speravimus.\n4\u00a0Sperastis in Domino in s\u00e6culis \u00e6ternis;\n in Domino Deo forti in perpetuum.\n5\u00a0Quia incurvabit habitantes in excelso;\n civitatem sublimem humiliabit:\n humiliabit eam usque ad terram,\n detrahet eam usque ad pulverem.\n6\u00a0Conculcabit eam pes,\n pedes pauperis, gressus egenorum.\n7\u00a0Semita justi recta est,\n rectus callis justi ad ambulandum.\n8\u00a0Et in semita judiciorum tuorum, Domine, sustinuimus te:\n nomen tuum et memoriale tuum in desiderio anim\u00e6.\n9\u00a0Anima mea desideravit te in nocte,\n sed et spiritu meo in pr\u00e6cordiis meis de mane vigilabo ad te.\n Cum feceris judicia tua in terra,\n justitiam discent habitatores orbis.\n10\u00a0Misereamur impio, et non discet justitiam;\n in terra sanctorum iniqua gessit,\n et non videbit gloriam Domini.\n11\u00a0Domine, exaltetur manus tua, et non videant;\n videant, et confundantur zelantes populi;\n et ignis hostes tuos devoret.\n12\u00a0Domine, dabis pacem nobis:\n omnia enim opera nostra\n operatus es nobis.\n13\u00a0Domine Deus noster, possederunt nos\n domini absque te;\n tantum in te recordemur nominis tui.\n14\u00a0Morientes non vivant,\n gigantes non resurgant:\n propterea visitasti et contrivisti eos,\n et perdidisti omnem memoriam eorum.\n15\u00a0Indulsisti genti, Domine,\n indulsisti genti, numquid glorificatus es?\n elongasti omnes terminos terr\u00e6.\n16\u00a0Domine, in angustia requisierunt te,\n in tribulatione murmuris doctrina tua eis.\n17\u00a0Sicut qu\u00e6 concipit, cum appropinquaverit ad partum,\n dolens clamat in doloribus suis,\n sic facti sumus a facie tua, Domine.\n18\u00a0Concepimus, et quasi parturivimus,\n et peperimus spiritum.\n Salutes non fecimus in terra;\n ideo non ceciderunt habitatores terr\u00e6.\n19\u00a0Vivent mortui tui,\n interfecti mei resurgent.\n Expergiscimini, et laudate,\n qui habitatis in pulvere,\n quia ros lucis ros tuus,\n et terram gigantum detrahes in ruinam.\n20\u00a0Vade, populus meus, intra in cubicula tua;\n claude ostia tua super te,\n abscondere modicum ad momentum,\n donec pertranseat indignatio.\n21\u00a0Ecce enim Dominus egredietur de loco suo,\n ut visitet iniquitatem habitatoris terr\u00e6 contra eum;\n et revelabit terra sanguinem suum, et non operiet ultra interfectos suos.]","title":"Vulgate: Isaiah: Isaiah Chapter 26","type":"page"}