{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa027.htm","path":"bib/vul/isa027.htm","source_url":"https://sacred-texts.com/bib/vul/isa027.htm","text":"1\u00a0[In die illa visitabit Dominus\n in gladio suo duro, et grandi, et forti,\n super Leviathan, serpentem vectem,\n et super Leviathan, serpentem tortuosum,\n et occidet cetum qui in mari est.\n2\u00a0In die illa vinea meri cantabit ei.\n3\u00a0Ego Dominus qui servo eam;\n repente propinabo ei.\n Ne forte visitetur contra eam,\n nocte et die servo eam.\n4\u00a0Indignatio non est mihi.\n Quis dabit me spinam et veprem in pr\u00e6lio?\n gradiar super eam,\n succendam eam pariter.\n5\u00a0An potius tenebit fortitudinem meam?\n faciet pacem mihi,\n pacem faciet mihi.\n6\u00a0Qui ingrediuntur impetu ad Jacob,\n florebit et germinabit Isra\u00ebl,\n et implebunt faciem orbis semine.\n7\u00a0Numquid juxta plagam percutientis se percussit eum?\n aut sicut occidit interfectos ejus, sic occisus est?\n8\u00a0In mensura contra mensuram,\n cum abjecta fuerit, judicabis eam;\n meditatus est in spiritu suo duro\n per diem \u00e6stus.\n9\u00a0Idcirco super hoc dimittetur iniquitas domui Jacob;\n et iste omnis fructus: ut auferatur peccatum ejus,\n cum posuerit omnes lapides altaris\n sicut lapides cineris allisos:\n non stabunt luci et delubra.\n10\u00a0Civitas enim munita desolata erit;\n speciosa relinquetur, et dimittetur quasi desertum;\n ibi pascetur vitulus,\n et ibi accubabit, et consumet summitates ejus.\n11\u00a0In siccitate messes illius conterentur.\n Mulieres venientes, et docentes eam;\n non est enim populus sapiens:\n propterea non miserebitur ejus qui fecit eum,\n et qui formavit eum non parcet ei.\n12\u00a0Et erit: in die illa\n percutiet Dominus\n ab alveo fluminis usque ad torrentem \u00c6gypti;\n et vos congregabimini unus et unus, filii Isra\u00ebl.\n13\u00a0Et erit: in die illa clangetur in tuba magna;\n et venient qui perditi fuerant de terra Assyriorum,\n et qui ejecti erant in terra \u00c6gypti,\n et adorabunt Dominum\n in monte sancto in Jerusalem.]","title":"Vulgate: Isaiah: Isaiah Chapter 27","type":"page"}