{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa029.htm","path":"bib/vul/isa029.htm","source_url":"https://sacred-texts.com/bib/vul/isa029.htm","text":"1\u00a0[V\u00e6 Ariel, Ariel\n civitas, quam expugnavit David!\n additus est annus ad annum:\n solemnitates evolut\u00e6 sunt.\n2\u00a0Et circumvallabo Ariel,\n et erit tristis et m\u0153rens,\n et erit mihi quasi Ariel.\n3\u00a0Et circumdabo quasi sph\u00e6ram in circuitu tuo,\n et jaciam contra te aggerem,\n et munimenta ponam in obsidionem tuam.\n4\u00a0Humiliaberis, de terra loqueris,\n et de humo audietur eloquium tuum;\n et erit quasi pythonis de terra vox tua,\n et de humo eloquium tuum mussitabit.\n5\u00a0Et erit sicut pulvis tenuis multitudo ventilantium te,\n et sicut favilla pertransiens multitudo eorum qui contra te pr\u00e6valuerunt;\n6\u00a0eritque repente confestim.\n A Domino exercituum visitabitur\n in tonitruo, et commotione terr\u00e6, et voce magna\n turbinis et tempestatis, et flamm\u00e6 ignis devorantis.\n7\u00a0Et erit sicut somnium visionis nocturn\u00e6\n multitudo omnium gentium qu\u00e6 dimicaverunt contra Ariel,\n et omnes qui militaverunt, et obsederunt,\n et pr\u00e6valuerunt adversus eam.\n8\u00a0Et sicut somniat esuriens, et comedit,\n cum autem fuerit expergefactus, vacua est anima ejus;\n et sicut somniat sitiens et bibit,\n et postquam fuerit expergefactus, lassus adhuc sitit,\n et anima ejus vacua est:\n sic erit multitudo omnium gentium\n qu\u00e6 dimicaverunt contra montem Sion.\n9\u00a0Obstupescite et admiramini;\n fluctuate et vacillate;\n inebriamini, et non a vino;\n movemini, et non ab ebrietate.\n10\u00a0Quoniam miscuit vobis Dominus\n spiritum soporis; claudet oculos vestros:\n prophetas et principes vestros, qui vident visiones, operiet.\n11\u00a0Et erit vobis visio omnium\n sicut verba libri signati,\n quem cum dederint scienti litteras,\n dicent: Lege istum:\n et respondebit: Non possum, signatus est enim.\n12\u00a0Et dabitur liber nescienti litteras,\n diceturque ei: Lege;\n et respondebit: Nescio litteras.\n13\u00a0Et dixit Dominus: Eo quod appropinquat populus iste ore suo,\n et labiis suis glorificat me,\n cor autem ejus longe est a me,\n et timuerunt me mandato hominum et doctrinis,\n14\u00a0ideo ecce ego addam ut admirationem faciam\n populo huic miraculo grandi et stupendo;\n peribit enim sapientia a sapientibus ejus,\n et intellectus prudentium ejus abscondetur.\n15\u00a0V\u00e6 qui profundi estis corde,\n ut a Domino abscondatis consilium;\n quorum sunt in tenebris opera,\n et dicunt: Quis videt nos?\n et quis novit nos?\n16\u00a0Perversa est h\u00e6c vestra cogitatio;\n quasi si lutum contra figulum cogitet,\n et dicat opus factori suo: Non fecisti me;\n et figmentum dicat fictori suo: Non intelligis.\n17\u00a0Nonne adhuc in modico et in brevi\n convertetur Libanus in carmel,\n et carmel in saltum reputabitur?\n18\u00a0Et audient in die illa surdi verba libri,\n et de tenebris et caligine oculi c\u00e6corum videbunt.\n19\u00a0Et addent mites in Domino l\u00e6titiam,\n et pauperes homines in Sancto Isra\u00ebl exsultabunt;\n20\u00a0quoniam defecit qui pr\u00e6valebat, consummatus est illusor,\n et succisi sunt omnes qui vigilabant super iniquitatem,\n21\u00a0qui peccare faciebant homines in verbo,\n et arguentem in porta supplantabant,\n et declinaverunt frustra a justo.\n22\u00a0Propter hoc, h\u00e6c dicit Dominus ad domum Jacob,\n qui redemit Abraham:\n Non modo confundetur Jacob,\n nec modo vultus ejus erubescet;\n23\u00a0sed cum viderit filios suos,\n opera manuum mearum in medio sui\n sanctificantes nomen meum,\n et sanctificabunt Sanctum Jacob,\n et Deum Isra\u00ebl pr\u00e6dicabunt;\n24\u00a0et scient errantes spiritu intellectum,\n et mussitatores discent legem.]","title":"Vulgate: Isaiah: Isaiah Chapter 29","type":"page"}