{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa030.htm","path":"bib/vul/isa030.htm","source_url":"https://sacred-texts.com/bib/vul/isa030.htm","text":"1\u00a0[V\u00e6 filii desertores, dicit Dominus,\n ut faceretis consilium, et non ex me,\n et ordiremini telam, et non per spiritum meum,\n ut adderetis peccatum super peccatum;\n2\u00a0qui ambulatis ut descendatis in \u00c6gyptum,\n et os meum non interrogastis,\n sperantes auxilium in fortitudine Pharaonis,\n et habentes fiduciam in umbra \u00c6gypti!\n3\u00a0Et erit vobis fortitudo Pharaonis in confusionem,\n et fiducia umbr\u00e6 \u00c6gypti in ignominiam.\n4\u00a0Erant enim in Tani principes tui,\n et nuntii tui usque ad Hanes pervenerunt.\n5\u00a0Omnes confusi sunt super populo qui eis prodesse non potuit:\n non fuerunt in auxilium et in aliquam utilitatem,\n sed in confusionem et in opprobrium.]\n6\u00a0Onus jumentorum austri. [In terra tribulationis et angusti\u00e6\n le\u00e6na, et leo ex eis,\n vipera et regulus volans;\n portantes super humeros jumentorum divitias suas,\n et super gibbum camelorum thesauros suos,\n ad populum qui eis prodesse non poterit.\n7\u00a0\u00c6gyptus enim frustra et vane auxiliabitur.\n Ideo clamavi super hoc: Superbia tantum est, quiesce.\n8\u00a0Nunc ergo ingressus, scribe ei super buxum,\n et in libro diligenter exara illud,\n et erit in die novissimo\n in testimonium usque in \u00e6ternum.\n9\u00a0Populus enim ad iracundiam provocans est:\n et filii mendaces,\n filii nolentes\n audire legem Dei;\n10\u00a0qui dicunt videntibus: Nolite videre,\n et aspicientibus: Nolite aspicere nobis ea qu\u00e6 recta sunt;\n loquimini nobis placentia:\n videte nobis errores.\n11\u00a0Auferte a me viam;\n declinate a me semitam;\n cesset a facie nostra\n Sanctus Isra\u00ebl.\n12\u00a0Propterea h\u00e6c dicit Sanctus Isra\u00ebl: Pro eo quod reprobastis verbum hoc,\n et sperastis in calumnia et in tumultu,\n et innixi estis super eo;\n13\u00a0propterea erit vobis iniquitas h\u00e6c\n sicut interruptio cadens,\n et requisita in muro excelso,\n quoniam subito, dum non speratur, veniet contritio ejus.\n14\u00a0Et comminuetur sicut conteritur lagena figuli\n contritione pervalida,\n et non invenietur de fragmentis ejus testa\n in qua portetur igniculus de incendio,\n aut hauriatur parum aqu\u00e6 de fovea.\n15\u00a0Quia h\u00e6c dicit Dominus Deus, Sanctus Isra\u00ebl:\n Si revertamini et quiescatis, salvi eritis;\n in silentio et in spe erit fortitudo vestra.\n Et noluistis,\n16\u00a0et dixistis: Nequaquam,\n sed ad equos fugiemus:\n ideo fugietis;\n et: Super veloces ascendemus:\n ideo velociores erunt qui persequentur vos.\n17\u00a0Mille homines a facie terroris unius;\n et a facie terroris quinque fugietis,\n donec relinquamini\n quasi malus navis in vertice montis,\n et quasi signum super collem.\n18\u00a0Propterea exspectat Dominus ut misereatur vestri;\n et ideo exaltabitur parcens vobis,\n quia Deus judicii Dominus:\n beati omnes qui exspectant eum!\n19\u00a0Populus enim Sion habitabit in Jerusalem:\n plorans nequaquam plorabis:\n miserans miserebitur tui, ad vocem clamoris tui:\n statim ut audierit, respondebit tibi.\n20\u00a0Et dabit vobis Dominus\n panem arctum, et aquam brevem;\n et non faciet avolare a te ultra doctorem tuum;\n et erunt oculi tui videntes pr\u00e6ceptorem tuum.\n21\u00a0Et aures tu\u00e6 audient verbum post tergum monentis:\n H\u00e6c est via; ambulate in ea,\n et non declinetis neque ad dexteram, neque ad sinistram.\n22\u00a0Et contaminabis laminas sculptilium argenti tui,\n et vestimentum conflatilis auri tui,\n et disperges ea sicut immunditiam menstruat\u00e6.\n Egredere, dices ei.\n23\u00a0Et dabitur pluvia semini tuo,\n ubicumque seminaveris in terra,\n et panis frugum terr\u00e6\n erit uberrimus et pinguis;\n pascetur in possessione tua in die illo agnus spatiose,\n24\u00a0et tauri tui, et pulli asinorum,\n qui operantur terram,\n commistum migma comedent\n sicut in area ventilatum est.\n25\u00a0Et erunt super omnem montem excelsum,\n et super omnem collem elevatum,\n rivi currentium aquarum,\n in die interfectionis multorum,\n cum ceciderint turres:\n26\u00a0et erit lux lun\u00e6 sicut lux solis,\n et lux solis erit septempliciter\n sicut lux septem dierum,\n in die qua alligaverit Dominus vulnus populi sui,\n et percussuram plag\u00e6 ejus sanaverit.\n27\u00a0Ecce nomen Domini venit de longinquo,\n ardens furor ejus, et gravis ad portandum;\n labia ejus repleta sunt indignatione,\n et lingua ejus quasi ignis devorans.\n28\u00a0Spiritus ejus velut torrens\n inundans usque ad medium colli,\n ad perdendas gentes in nihilum,\n et frenum erroris quod erat in maxillis populorum.\n29\u00a0Canticum erit vobis\n sicut nox sanctificat\u00e6 solemnitatis,\n et l\u00e6titia cordis\n sicut qui pergit cum tibia,\n ut intret in montem Domini\n ad Fortem Isra\u00ebl.\n30\u00a0Et auditam faciet Dominus gloriam vocis su\u00e6,\n et terrorem brachii sui ostendet\n in comminatione furoris, et flamma ignis devorantis:\n allidet in turbine, et in lapide grandinis.\n31\u00a0A voce enim Domini pavebit Assur\n virga percussus.\n32\u00a0Et erit transitus virg\u00e6 fundatus,\n quam requiescere faciet Dominus super eum\n in tympanis et citharis;\n et in bellis pr\u00e6cipuis expugnabit eos.\n33\u00a0Pr\u00e6parata est enim ab heri Topheth,\n a rege pr\u00e6parata,\n profunda, et dilatata.\n Nutrimenta ejus, ignis et ligna multa;\n flatus Domini sicut torrens sulphuris succendens eam.]","title":"Vulgate: Isaiah: Isaiah Chapter 30","type":"page"}