{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa034.htm","path":"bib/vul/isa034.htm","source_url":"https://sacred-texts.com/bib/vul/isa034.htm","text":"1\u00a0[Accedite, gentes, et audite;\n et populi, attendite:\n audiat terra, et plenitudo ejus;\n orbis, et omne germen ejus.\n2\u00a0Quia indignatio Domini super omnes gentes,\n et furor super universam militiam eorum:\n interfecit eos, et dedit eos in occisionem.\n3\u00a0Interfecti eorum projicientur,\n et de cadaveribus eorum ascendet f\u0153tor;\n tabescent montes a sanguine eorum.\n4\u00a0Et tabescet omnis militia c\u00e6lorum,\n et complicabuntur sicut liber c\u00e6li:\n et omnis militia eorum defluet,\n sicut defluit folium de vinea et de ficu.\n5\u00a0Quoniam inebriatus est in c\u00e6lo gladius meus;\n ecce super Idum\u00e6am descendet,\n et super populum interfectionis me\u00e6, ad judicium.\n6\u00a0Gladius Domini repletus est sanguine,\n incrassatus est adipe,\n de sanguine agnorum et hircorum,\n de sanguine medullatorum arietum:\n victima enim Domini in Bosra,\n et interfectio magna in terra Edom.\n7\u00a0Et descendent unicornes cum eis,\n et tauri cum potentibus;\n inebriabitur terra eorum sanguine,\n et humus eorum adipe pinguium.\n8\u00a0Quia dies ultionis Domini,\n annus retributionum judicii Sion.\n9\u00a0Et convertentur torrentes ejus in picem,\n et humus ejus in sulphur;\n et erit terra ejus in picem ardentem.\n10\u00a0Nocte et die non extinguetur,\n in sempiternum ascendet fumus ejus,\n a generatione in generationem desolabitur,\n in s\u00e6cula s\u00e6culorum non erit transiens per eam.\n11\u00a0Et possidebunt illam onocrotalus et ericius;\n ibis et corvus habitabunt in ea:\n et extendetur super eam mensura, ut redigatur ad nihilum,\n et perpendiculum in desolationem.\n12\u00a0Nobiles ejus non erunt ibi; regem potius invocabunt,\n et omnes principes ejus erunt in nihilum.\n13\u00a0Et orientur in domibus ejus spin\u00e6 et urtic\u00e6,\n et paliurus in munitionibus ejus;\n et erit cubile draconum,\n et pascua struthionum.\n14\u00a0Et occurrent d\u00e6monia onocentauris,\n et pilosus clamabit alter ad alterum;\n ibi cubavit lamia,\n et invenit sibi requiem.\n15\u00a0Ibi habuit foveam ericius, et enutrivit catulos,\n et circumfodit, et fovit in umbra ejus;\n illuc congregati sunt milvi, alter ad alterum.\n16\u00a0Requirite diligenter in libro Domini, et legite:\n Unum ex eis non defuit,\n alter alterum non qu\u00e6sivit;\n quia quod ex ore meo procedit, ille mandavit,\n et spiritus ejus ipse congregavit ea.\n17\u00a0Et ipse misit eis sortem,\n et manus ejus divisit eam illis in mensuram:\n usque in \u00e6ternum possidebunt eam;\n in generationem et generationem habitabunt in ea.]","title":"Vulgate: Isaiah: Isaiah Chapter 34","type":"page"}