{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa039.htm","path":"bib/vul/isa039.htm","source_url":"https://sacred-texts.com/bib/vul/isa039.htm","text":"1 In tempore illo misit Merodach Baladan, filius Baladan, rex Babylonis, libros et munera ad Ezechiam: audierat enim quod \u00e6grotasset et convaluisset.\n2 L\u00e6tatus est autem super eis Ezechias, et ostendit eis cellam aromatum, et argenti, et auri, et odoramentorum, et unguenti optimi, et omnes apothecas supellectilis su\u00e6, et universa qu\u00e6 inventa sunt in thesauris ejus. Non fuit verbum quod non ostenderet eis Ezechias in domo sua, et in omni potestate sua.\n3 Introivit autem Isaias propheta ad Ezechiam regem, et dixit ei: Quid dixerunt viri isti, et unde venerunt ad te? Et dixit Ezechias: De terra longinqua venerunt ad me, de Babylone.\n4 Et dixit: Quid viderunt in domo tua? Et dixit Ezechias: Omnia qu\u00e6 in domo mea sunt viderunt; non fuit res quam non ostenderim eis in thesauris meis.\n5 Et dixit Isaias ad Ezechiam: Audi verbum Domini exercituum.\n6 Ecce dies venient, et auferentur omnia qu\u00e6 in domo tua sunt, et qu\u00e6 thesaurizaverunt patres tui usque ad diem hanc, in Babylonem; non relinquetur quidquam, dicit Dominus.\n7 Et de filiis tuis, qui exibunt de te, quos genueris, tollent, et erunt eunuchi in palatio regis Babylonis.\n8 Et dixit Ezechias ad Isaiam: Bonum verbum Domini, quod locutus est. Et dixit: Fiat tantum pax et veritas in diebus meis!","title":"Vulgate: Isaiah: Isaiah Chapter 39","type":"page"}