{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa041.htm","path":"bib/vul/isa041.htm","source_url":"https://sacred-texts.com/bib/vul/isa041.htm","text":"1\u00a0[Taceant ad me insul\u00e6,\n et gentes mutent fortitudinem:\n accedant, et tunc loquantur;\n simul ad judicium propinquemus.\n2\u00a0Quis suscitavit ab oriente Justum,\n vocavit eum ut sequeretur se?\n Dabit in conspectu ejus gentes,\n et reges obtinebit:\n dabit quasi pulverem gladio ejus,\n sicut stipulam vento raptam arcui ejus.\n3\u00a0Persequetur eos, transibit in pace:\n semita in pedibus ejus non apparebit.\n4\u00a0Quis h\u00e6c operatus est, et fecit,\n vocans generationes ab exordio?\n Ego Dominus:\n primus et novissimus ego sum.\n5\u00a0Viderunt insul\u00e6, et timuerunt;\n extrema terr\u00e6 obstupuerunt:\n appropinquaverunt, et accesserunt.\n6\u00a0Unusquisque proximo suo auxiliabitur,\n et fratri suo dicet: Confortare.\n7\u00a0Confortavit faber \u00e6rarius\n percutiens malleo\n eum, qui cudebat tunc temporis,\n dicens: Glutino bonum est;\n et confortavit eum clavis, ut non moveretur.]\n \n8\u00a0[Et tu, Isra\u00ebl, serve meus,\n Jacob quem elegi,\n semen Abraham amici mei:\n9\u00a0in quo apprehendi te ab extremis terr\u00e6,\n et a longinquis ejus vocavi te,\n et dixi tibi: Servus meus es tu:\n elegi te, et non abjeci te.\n10\u00a0Ne timeas, quia ego tecum sum;\n ne declines, quia ego Deus tuus:\n confortavi te, et auxiliatus sum tibi,\n et suscepit te dextera Justi mei.\n11\u00a0Ecce confundentur et erubescent\n omnes qui pugnant adversum te;\n erunt quasi non sint, et peribunt\n viri qui contradicunt tibi.\n12\u00a0Qu\u00e6res eos, et non invenies,\n viros rebelles tuos;\n erunt quasi non sint, et veluti consumptio\n homines bellantes adversum te.\n13\u00a0Quia ego Dominus Deus tuus,\n apprehendens manum tuam,\n dicensque tibi: Ne timeas:\n ego adjuvi te.\n14\u00a0Noli timere, vermis Jacob,\n qui mortui estis ex Isra\u00ebl:\n ego auxiliatus sum tibi, dicit Dominus,\n et redemptor tuus Sanctus Isra\u00ebl.\n15\u00a0Ego posui te quasi plaustrum triturans novum,\n habens rostra serrantia;\n triturabis montes, et comminues,\n et colles quasi pulverem pones.\n16\u00a0Ventilabis eos, et ventus tollet,\n et turbo disperget eos;\n et tu exsultabis in Domino,\n in Sancto Isra\u00ebl l\u00e6taberis.\n17\u00a0Egeni et pauperes\n qu\u00e6runt aquas, et non sunt;\n lingua eorum siti aruit.\n Ego Dominus exaudiam eos,\n Deus Isra\u00ebl, non derelinquam eos.\n18\u00a0Aperiam in supinis collibus flumina,\n et in medio camporum fontes:\n ponam desertum in stagna aquarum,\n et terram inviam in rivos aquarum.\n19\u00a0Dabo in solitudinem cedrum,\n et spinam, et myrtum, et lignum oliv\u00e6;\n ponam in deserto abietem,\n ulmum, et buxum simul:\n20\u00a0ut videant, et sciant,\n et recogitent, et intelligant pariter,\n quia manus Domini fecit hoc,\n et Sanctus Isra\u00ebl creavit illud.\n21\u00a0Prope facite judicium vestrum,\n dicit Dominus;\n Afferte, si quid forte habetis,\n dicit rex Jacob.\n22\u00a0Accedant, et nuntient nobis\n qu\u00e6cumque ventura sunt;\n priora qu\u00e6 fuerunt, nuntiate,\n et ponemus cor nostrum,\n et sciemus novissima eorum;\n et qu\u00e6 ventura sunt, indicate nobis.\n23\u00a0Annuntiate qu\u00e6 ventura sunt in futurum,\n et sciemus quia dii estis vos;\n bene quoque aut male, si potestis, facite,\n et loquamur et videamus simul.\n24\u00a0Ecce vos estis ex nihilo,\n et opus vestrum ex eo quod non est:\n abominatio est qui elegit vos.\n25\u00a0Suscitavi ab aquilone, et veniet ab ortu solis:\n vocabit nomen meum,\n et adducet magistratus quasi lutum,\n et velut plastes conculcans humum.\n26\u00a0Quis annuntiavit ab exordio ut sciamus,\n et a principio ut dicamus: Justus es?\n Non est neque annuntians, neque pr\u00e6dicens,\n neque audiens sermones vestros.\n27\u00a0Primus ad Sion dicet: Ecce adsunt,\n et Jerusalem evangelistam dabo.\n28\u00a0Et vidi,\n et non erat neque ex istis quisquam\n qui iniret consilium,\n et interrogatus responderet verbum.\n29\u00a0Ecce omnes injusti,\n et vana opera eorum;\n ventus et inane simulacra eorum.]","title":"Vulgate: Isaiah: Isaiah Chapter 41","type":"page"}