{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa042.htm","path":"bib/vul/isa042.htm","source_url":"https://sacred-texts.com/bib/vul/isa042.htm","text":"1\u00a0[Ecce servus meus, suscipiam eum;\n electus meus, complacuit sibi in illo anima mea:\n dedi spiritum meum super eum:\n judicium gentibus proferet.\n2\u00a0Non clamabit, neque accipiet personam,\n nec audietur vox ejus foris.\n3\u00a0Calamum quassatum non conteret,\n et linum fumigans non extinguet:\n in veritate educet judicium.\n4\u00a0Non erit tristis, neque turbulentus,\n donec ponat in terra judicium;\n et legem ejus insul\u00e6 exspectabunt.\n5\u00a0H\u00e6c dicit Dominus Deus,\n creans c\u00e6los, et extendens eos;\n formans terram, et qu\u00e6 germinant ex ea;\n dans flatum populo qui est super eam,\n et spiritum calcantibus eam:\n6\u00a0Ego Dominus vocavi te in justitia,\n et apprehendi manum tuam,\n et servavi te:\n et dedi te in f\u0153dus populi,\n in lucem gentium,\n7\u00a0ut aperires oculos c\u00e6corum,\n et educeres de conclusione vinctum,\n de domo carceris sedentes in tenebris.\n8\u00a0Ego Dominus,\n hoc est nomen meum;\n gloriam meam alteri non dabo,\n et laudem meam sculptilibus.\n9\u00a0Qu\u00e6 prima fuerunt, ecce venerunt;\n nova quoque ego annuntio:\n antequam oriantur,\n audita vobis faciam.]\n \n10\u00a0[Cantate Domino canticum novum,\n laus ejus ab extremis terr\u00e6,\n qui descenditis in mare, et plenitudo ejus;\n insul\u00e6, et habitatores earum.\n11\u00a0Sublevetur desertum et civitates ejus.\n In domibus habitabit Cedar:\n laudate, habitatores petr\u00e6;\n de vertice montium clamabunt.\n12\u00a0Ponent Domino gloriam,\n et laudem ejus in insulis nuntiabunt.\n13\u00a0Dominus sicut fortis egredietur,\n sicut vir pr\u00e6liator suscitabit zelum;\n vociferabitur, et clamabit:\n super inimicos suos confortabitur.]\n \n14\u00a0[Tacui semper,\n silui, patiens fui:\n sicut parturiens loquar;\n dissipabo, et absorbebo simul.\n15\u00a0Desertos faciam montes et colles,\n et omne gramen eorum exsiccabo;\n et ponam flumina in insulas,\n et stagna arefaciam.\n16\u00a0Et ducam c\u00e6cos in viam quam nesciunt,\n et in semitis quas ignoraverunt ambulare eos faciam;\n ponam tenebras coram eis in lucem,\n et prava in recta;\n h\u00e6c verba feci eis,\n et non dereliqui eos.\n17\u00a0Conversi sunt retrorsum, confundantur confusione,\n qui confidunt in sculptili;\n qui dicunt conflatili:\n Vos dii nostri.\n18\u00a0Surdi, audite,\n et c\u00e6ci, intuemini ad videndum.\n19\u00a0Quis c\u00e6cus, nisi servus meus;\n et surdus, nisi ad quem nuntios meos misi?\n quis c\u00e6cus, nisi qui venundatus est?\n et quis c\u00e6cus, nisi servus Domini?\n20\u00a0Qui vides multa, nonne custodies?\n qui apertas habes aures, nonne audies?\n21\u00a0Et Dominus voluit ut sanctificaret eum,\n et magnificaret legem, et extolleret.\n22\u00a0Ipse autem populus direptus, et vastatus;\n laqueus juvenum omnes,\n et in domibus carcerum absconditi sunt;\n facti sunt in rapinam, nec est qui eruat;\n in direptionem, nec est qui dicat: Redde.\n23\u00a0Quis est in vobis qui audiat hoc,\n attendat, et auscultet futura?\n24\u00a0Quis dedit in direptionem Jacob,\n et Isra\u00ebl vastantibus?\n nonne Dominus ipse, cui peccavimus?\n Et noluerunt in viis ejus ambulare,\n et non audierunt legem ejus.\n25\u00a0Et effudit super eum indignationem furoris sui,\n et forte bellum;\n et combussit eum in circuitu, et non cognovit;\n et succendit eum, et non intellexit.]","title":"Vulgate: Isaiah: Isaiah Chapter 42","type":"page"}