{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa043.htm","path":"bib/vul/isa043.htm","source_url":"https://sacred-texts.com/bib/vul/isa043.htm","text":"1\u00a0[Et nunc h\u00e6c dicit Dominus\n creans te, Jacob,\n et formans te, Isra\u00ebl:\n Noli timere, quia redemi te,\n et vocavi te nomine tuo: meus es tu.\n2\u00a0Cum transieris per aquas, tecum ero,\n et flumina non operient te;\n cum ambulaveris in igne, non combureris, et flamma non ardebit in te.\n3\u00a0Quia ego Dominus Deus tuus,\n Sanctus Isra\u00ebl, salvator tuus,\n dedi propitiationem tuam \u00c6gyptum,\n \u00c6thopiam, et Saba, pro te.\n4\u00a0Ex quo honorabilis factus es in oculis meis,\n et gloriosus, ego dilexi te,\n et dabo homines pro te,\n et populos pro anima tua.\n5\u00a0Noli timere, quia ego tecum sum;\n ab oriente adducam semen tuum,\n et ab occidente congregabo te.\n6\u00a0Dicam aquiloni: Da;\n et austro: Noli prohibere:\n affer filios meos de longinquo,\n et filias meas ab extremis terr\u00e6.\n7\u00a0Et omnem qui invocat nomen meum,\n in gloriam meam creavi eum, formavi eum, et feci eum.\n8\u00a0Educ foras populum c\u00e6cum, et oculos habentem;\n surdum, et aures ei sunt.\n9\u00a0Omnes gentes congregat\u00e6 sunt simul,\n et collect\u00e6 sunt tribus.\n Quis in vobis annuntiet istud,\n et qu\u00e6 prima sunt audire nos faciet?\n Dent testes eorum, justificentur,\n et audiant, et dicant: Vere.\n10\u00a0Vos testes mei, dicit Dominus,\n et servus meus quem elegi:\n ut sciatis, et credatis mihi,\n et intelligatis quia ego ipse sum;\n ante me non est formatus Deus,\n et post me non erit.\n11\u00a0Ego sum, ego sum Dominus,\n et non est absque me salvator.\n12\u00a0Ego annuntiavi, et salvavi; auditum feci,\n et non fuit in vobis alienus:\n vos testes mei, dicit Dominus,\n et ego Deus.\n13\u00a0Et ab initio ego ipse,\n et non est qui de manu mea eruat.\n Operabor, et quis avertet illud?]\n \n14\u00a0[H\u00e6c dicit Dominus, redemptor vester,\n Sanctus Isra\u00ebl:\n Propter vos misi in Babylonem,\n et detraxi vectes universos,\n et Chald\u00e6os in navibus suis gloriantes.\n15\u00a0Ego Dominus, Sanctus vester,\n creans Isra\u00ebl, rex vester.\n16\u00a0H\u00e6c dicit Dominus,\n qui dedit in mari viam,\n et in aquis torrentibus semitam;\n17\u00a0qui eduxit quadrigam et equum,\n agmen et robustum:\n simul obdormierunt, nec resurgent;\n contriti sunt quasi linum, et extincti sunt.\n18\u00a0Ne memineritis priorum,\n et antiqua ne intueamini.\n19\u00a0Ecce ego facio nova,\n et nunc orientur, utique cognoscetis ea:\n ponam in deserto viam,\n et in invio flumina.\n20\u00a0Glorificabit me bestia agri,\n dracones, et struthiones:\n quia dedi in deserto aquas,\n flumina in invio,\n ut darem potum populo meo, electo meo.\n21\u00a0Populum istum formavi mihi:\n laudem meam narrabit.]\n \n22\u00a0[Non me invocasti, Jacob,\n nec laborasti in me, Isra\u00ebl.\n23\u00a0Non obtulisti mihi arietem holocausti tui,\n et victimis tuis non glorificasti me;\n non te servire feci in oblatione,\n nec laborem tibi pr\u00e6bui in thure.\n24\u00a0Non emisti mihi argento calamum,\n et adipe victimarum tuarum non inebriasti me:\n verumtamen servire me fecisti in peccatis tuis;\n pr\u00e6buisti mihi laborem in iniquitatibus tuis.\n25\u00a0Ego sum, ego sum ipse qui deleo iniquitates tuas propter me,\n et peccatorum tuorum non recordabor.\n26\u00a0Reduc me in memoriam, et judicemur simul:\n narra si quid habes ut justificeris.\n27\u00a0Pater tuus primus peccavit,\n et interpretes tui pr\u00e6varicati sunt in me:\n28\u00a0et contaminavi principes sanctos;\n dedi ad internecionem Jacob,\n et Isra\u00ebl in blasphemiam.]","title":"Vulgate: Isaiah: Isaiah Chapter 43","type":"page"}