{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa044.htm","path":"bib/vul/isa044.htm","source_url":"https://sacred-texts.com/bib/vul/isa044.htm","text":"1\u00a0[Et nunc audi, Jacob, serve meus,\n et Isra\u00ebl, quem elegi.\n2\u00a0H\u00e6c dicit Dominus faciens et formans te,\n ab utero auxiliator tuus:\n Noli timere, serve meus Jacob,\n et rectissime, quem elegi.\n3\u00a0Effundam enim aquas super sitientem,\n et fluenta super aridam;\n effundam spiritum meum super semen tuum,\n et benedictionem meam super stirpem tuam:\n4\u00a0et germinabunt inter herbas,\n quasi salices juxta pr\u00e6terfluentes aquas.\n5\u00a0Iste dicet: Domini ego sum;\n et ille vocabit in nomine Jacob;\n et hic scribet manu sua: Domino,\n et in nomine Isra\u00ebl assimilabitur.]\n \n6\u00a0[H\u00e6c dicit Dominus, rex Isra\u00ebl,\n et redemptor ejus, Dominus exercituum:\n Ego primus, et ego novissimus,\n et absque me non est deus.\n7\u00a0Quis similis mei? vocet,\n et annuntiet: et ordinem exponat mihi,\n ex quo constitui populum antiquum;\n ventura et qu\u00e6 futura sunt annuntient eis.\n8\u00a0Nolite timere, neque conturbemini:\n ex tunc audire te feci,\n et annuntiavi; vos estis testes mei.\n Numquid est Deus absque me,\n et formator quem ego non noverim?\n9\u00a0Plast\u00e6 idoli omnes nihil sunt,\n et amantissima eorum non proderunt eis.\n Ipsi sunt testes eorum, quia non vident,\n neque intelligunt, ut confundantur.\n10\u00a0Quis formavit deum,\n et sculptile conflavit ad nihil utile?\n11\u00a0Ecce omnes participes ejus confundentur,\n fabri enim sunt ex hominibus;\n convenient omnes, stabunt\n et pavebunt, et confundentur simul.\n12\u00a0Faber ferrarius lima operatus est,\n in prunis et in malleis formavit illud,\n et operatus est in brachio fortitudinis su\u00e6;\n esuriet et deficiet,\n non bibet aquam et lassescet.\n13\u00a0Artifex lignarius extendit normam,\n formavit illud in runcina,\n fecit illud in angularibus,\n et in circino tornavit illud,\n et fecit imaginem viri\n quasi speciosum hominem\n habitantem in domo;\n14\u00a0succidit cedros,\n tulit ilicem, et quercum,\n qu\u00e6 steterat inter ligna saltus;\n plantavit pinum, quam pluvia nutrivit:\n15\u00a0et facta est hominibus in focum;\n sumpsit ex eis, et calefactus est;\n et succendit et coxit panes;\n de reliquo autem operatus est deum et adoravit;\n fecit sculptile, et curvatus est ante illud.\n16\u00a0Medium ejus combussit igni,\n et de medio ejus carnes comedit;\n coxit pulmentum, et saturatus est,\n et calefactus est, et dixit: Vah!\n calefactus sum, vidi focum;\n17\u00a0reliquum autem ejus deum fecit et sculptile sibi;\n curvatur ante illud, et adorat illud,\n et obsecrat, dicens:\n Libera me, quia deus meus es tu!\n18\u00a0Nescierunt, neque intellexerunt;\n obliti enim sunt ne videant oculi eorum,\n et ne intelligant corde suo.\n19\u00a0Non recogitant in mente sua,\n neque cognoscunt, neque sentiunt, ut dicant:\n Medietatem ejus combussi igni,\n et coxi super carbones ejus panes;\n coxi carnes et comedi,\n et de reliquo ejus idolum faciam?\n ante truncum ligni procidam?\n20\u00a0Pars ejus cinis est;\n cor insipiens adoravit illud,\n et non liberabit animam suam:\n neque dicet: Forte mendacium est in dextera mea.\n21\u00a0Memento horum Jacob,\n et Isra\u00ebl, quoniam servus meus es tu.\n Formavi te; servus meus es tu,\n Isra\u00ebl, ne obliviscaris mei.\n22\u00a0Delevi ut nubem iniquitates tuas,\n et quasi nebulam peccata tua:\n revertere ad me, quoniam redemi te.\n23\u00a0Laudate, c\u00e6li, quoniam misericordiam fecit Dominus;\n jubilate, extrema terr\u00e6;\n resonate, montes, laudationem,\n saltus et omne lignum ejus,\n quoniam redemit Dominus Jacob,\n et Isra\u00ebl gloriabitur.]\n \n24\u00a0[H\u00e6c dicit Dominus, redemptor tuus,\n et formator tuus ex utero:\n Ego sum Dominus, faciens omnia,\n extendens c\u00e6los solus,\n stabiliens terram, et nullus mecum;\n25\u00a0irrita faciens signa divinorum,\n et ariolos in furorem vertens;\n convertens sapientes retrorsum,\n et scientiam eorum stultam faciens;\n26\u00a0suscitans verbum servi sui,\n et consilium nuntiorum suorum complens;\n qui dico Jerusalem: Habitaberis,\n et civitatibus Juda: \u00c6dificabimini,\n et deserta ejus suscitabo;\n27\u00a0qui dico profundo: Desolare,\n et flumina tua arefaciam;\n28\u00a0qui dico Cyro: Pastor meus es,\n et omnem voluntatem meam complebis;\n qui dico Jerusalem: \u00c6dificaberis,\n et templo: Fundaberis.]","title":"Vulgate: Isaiah: Isaiah Chapter 44","type":"page"}