{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa045.htm","path":"bib/vul/isa045.htm","source_url":"https://sacred-texts.com/bib/vul/isa045.htm","text":"1\u00a0[H\u00e6c dicit Dominus christo meo Cyro,\n cujus apprehendi dexteram,\n ut subjiciam ante faciem ejus gentes,\n et dorsa regum vertam,\n et aperiam coram eo januas,\n et port\u00e6 non claudentur:\n2\u00a0Ego ante te ibo, et gloriosos terr\u00e6 humiliabo;\n portas \u00e6reas conteram,\n et vectes ferreos confringam:\n3\u00a0et dabo tibi thesauros absconditos,\n et arcana secretorum,\n ut scias quia ego Dominus,\n qui voco nomen tuum, Deus Isra\u00ebl,\n4\u00a0propter servum meum Jacob,\n et Isra\u00ebl, electum meum;\n et vocavi te nomine tuo:\n assimilavi te, et non cognovisti me.\n5\u00a0Ego Dominus, et non est amplius;\n extra me non est deus;\n accinxi te, et non cognovisti me:\n6\u00a0ut sciant hi qui ab ortu solis et qui ab occidente,\n quoniam absque me non est:\n ego Dominus, et non est alter:\n7\u00a0formans lucem et creans tenebras,\n faciens pacem et creans malum:\n ego Dominus faciens omnia h\u00e6c.\n8\u00a0Rorate, c\u00e6li, desuper,\n et nubes pluant justum;\n aperiatur terra, et germinet Salvatorem,\n et justitia oriatur simul:\n ego Dominus creavi eum.]\n \n9\u00a0[V\u00e6 qui contradicit fictori suo,\n testa de samiis terr\u00e6!\n Numquid dicet lutum figulo suo: Quid facis,\n et opus tuum absque manibus est?\n10\u00a0V\u00e6 qui dicit patri: Quid generas?\n et mulieri: Quid parturis?\n11\u00a0H\u00e6c dicit Dominus,\n Sanctus Isra\u00ebl, plastes ejus:\n Ventura interrogate me;\n super filios meos et super opus manuum mearum mandate mihi.\n12\u00a0Ego feci terram,\n et hominem super eam creavi ego:\n manus me\u00e6 tetenderunt c\u00e6los,\n et omni militi\u00e6 eorum mandavi.\n13\u00a0Ego suscitavi eum ad justitiam,\n et omnes vias ejus dirigam;\n ipse \u00e6dificabit civitatem meam,\n et captivitatem meam dimittet,\n non in pretio neque in muneribus,\n dicit Dominus Deus exercituum.]\n \n14\u00a0[H\u00e6c dicit Dominus:\n Labor \u00c6gypti, et negotiatio \u00c6thiopi\u00e6,\n et Sabaim viri sublimes\n ad te transibunt, et tui erunt;\n post te ambulabunt,\n vincti manicis pergent, et te adorabunt,\n teque deprecabuntur.\n Tantum in te est Deus,\n et non est absque te deus.\n15\u00a0Vere tu es Deus absconditus,\n Deus Isra\u00ebl, salvator.\n16\u00a0Confusi sunt, et erubuerunt omnes:\n simul abierunt in confusionem fabricatores errorum.\n17\u00a0Isra\u00ebl salvatus est in Domino salute \u00e6terna;\n non confundemini, et non erubescetis usque in s\u00e6culum s\u00e6culi.\n18\u00a0Quia h\u00e6c dicit Dominus\n creans c\u00e6los,\n ipse Deus formans terram\n et faciens eam, ipse plastes ejus;\n non in vanum creavit eam:\n ut habitaretur formavit eam:\n Ego Dominus, et non est alius.\n19\u00a0Non in abscondito locutus sum,\n in loco terr\u00e6 tenebroso;\n non dixi semini Jacob frustra:\n Qu\u00e6rite me:\n ego Dominus loquens justitiam,\n annuntians recta.\n20\u00a0Congregamini, et venite, et accedite simul\n qui salvati estis ex gentibus:\n nescierunt qui levant lignum sculptur\u00e6 su\u00e6,\n et rogant deum non salvantem.\n21\u00a0Annuntiate, et venite,\n et consiliamini simul.\n Quis auditum fecit hoc ab initio,\n ex tunc pr\u00e6dixit illud?\n numquid non ego Dominus,\n et non est ultra deus absque me?\n Deus justus, et salvans non est pr\u00e6ter me.\n22\u00a0Convertimini ad me, et salvi eritis,\n omnes fines terr\u00e6,\n quia ego Deus, et non est alius.\n23\u00a0In memetipso juravi;\n egredietur de ore meo justiti\u00e6 verbum,\n et non revertetur:\n quia mihi curvabitur omne genu,\n et jurabit omnis lingua.\n24\u00a0Ergo in Domino, dicet,\n me\u00e6 sunt justiti\u00e6 et imperium;\n ad eum venient, et confundentur\n omnes qui repugnant ei.\n25\u00a0In Domino justificabitur, et laudabitur\n omne semen Isra\u00ebl.]","title":"Vulgate: Isaiah: Isaiah Chapter 45","type":"page"}