{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa046.htm","path":"bib/vul/isa046.htm","source_url":"https://sacred-texts.com/bib/vul/isa046.htm","text":"1\u00a0[Confractus est Bel, contritus est Nabo;\n facta sunt simulacra eorum bestiis et jumentis,\n onera vestra gravi pondere\n usque ad lassitudinem.\n2\u00a0Contabuerunt, et contrita sunt simul;\n non potuerunt salvare portantem,\n et anima eorum in captivitatem ibit.\n3\u00a0Audite me, domus Jacob,\n et omne residuum domus Isra\u00ebl;\n qui portamini a meo utero,\n qui gestamini a mea vulva.\n4\u00a0Usque ad senectam ego ipse,\n et usque ad canos ego portabo;\n ego feci, et ego feram;\n ego portabo, et salvabo.\n5\u00a0Cui assimilastis me, et ad\u00e6quastis,\n et comparastis me, et fecistis similem?\n6\u00a0Qui confertis aurum de sacculo,\n et argentum statera ponderatis,\n conducentes aurificem ut faciat deum,\n et procidunt, et adorant.\n7\u00a0Portant illum in humeris gestantes,\n et ponentes in loco suo,\n et stabit, ac de loco suo non movebitur:\n sed et cum clamaverint ad eum, non audiet;\n de tribulatione non salvabit eos.\n8\u00a0Mementote istud, et confundamini;\n redite, pr\u00e6varicatores, ad cor.\n9\u00a0Recordamini prioris s\u00e6culi,\n quoniam ego sum Deus, et non est ultra deus,\n nec est similis mei.\n10\u00a0Annuntians ab exordio novissimum,\n et ab initio qu\u00e6 necdum facta sunt,\n dicens: Consilium meum stabit,\n et omnis voluntas mea fiet.\n11\u00a0Vocans ab oriente avem,\n et de terra longinqua virum voluntatis me\u00e6:\n et locutus sum, et adducam illud;\n creavi et faciam illud.\n12\u00a0Audite me, duro corde,\n qui longe estis a justitia.\n13\u00a0Prope feci justitiam meam, non elongabitur,\n et salus mea non morabitur.\n Dabo in Sion salutem,\n et in Isra\u00ebl gloriam meam.]","title":"Vulgate: Isaiah: Isaiah Chapter 46","type":"page"}