{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa047.htm","path":"bib/vul/isa047.htm","source_url":"https://sacred-texts.com/bib/vul/isa047.htm","text":"1\u00a0[Descende, sede in pulvere,\n virgo filia Babylon:\n sede in terra; non est solium\n fili\u00e6 Chald\u00e6orum,\n quia ultra non vocaberis\n mollis et tenera.\n2\u00a0Tolle molam, et mole farinam;\n denuda turpitudinem tuam;\n discooperi humerum, revela crura,\n transi flumina.\n3\u00a0Revelabitur ignominia tua,\n et videbitur opprobrium tuum;\n ultionem capiam, et non resistet mihi homo.\n4\u00a0Redemptor noster, Dominus exercituum nomen illius,\n Sanctus Isra\u00ebl.\n5\u00a0Sede tacens, et intra in tenebras,\n filia Chald\u00e6orum,\n quia non vocaberis ultra\n domina regnorum.\n6\u00a0Iratus sum super populum meum:\n contaminavi h\u00e6reditatem meam,\n et dedi eos in manu tua:\n non posuisti eis misericordias;\n super senem aggravasti jugum tuum valde.\n7\u00a0Et dixisti: In sempiternum ero domina.\n Non posuisti h\u00e6c super cor tuum,\n neque recordata es novissimi tui.\n8\u00a0Et nunc audi h\u00e6c delicata,\n et habitans confidenter,\n qu\u00e6 dicis in corde tuo:\n Ego sum, et non est pr\u00e6ter me amplius;\n non sedebo vidua,\n et ignorabo sterilitatem.\n9\u00a0Venient tibi duo h\u00e6c\n subito in die una,\n sterilitas et viduitas:\n universa venerunt super te,\n propter multitudinem maleficiorum tuorum,\n et propter duritiam incantatorum tuorum vehementem.\n10\u00a0Et fiduciam habuisti in malitia tua,\n et dixisti: Non est qui videat me.\n Sapientia tua et scientia tua,\n h\u00e6c decepit te.\n Et dixisti in corde tuo:\n Ego sum, et pr\u00e6ter me non est altera.\n11\u00a0Veniet super te malum,\n et nescies ortum ejus;\n et irruet super te calamitas\n quam non poteris expiare;\n veniet super te repente miseria\n quam nescies.\n12\u00a0Sta cum incantatoribus tuis\n et cum multitudine maleficiorum tuorum,\n in quibus laborasti ab adolescentia tua,\n si forte quod prosit tibi,\n aut si possis fieri fortior.\n13\u00a0Defecisti in multitudine consiliorum tuorum.\n Stent, et salvent te\n augures c\u00e6li,\n qui contemplabantur sidera,\n et supputabant menses,\n ut ex eis annuntiarent ventura tibi.\n14\u00a0Ecce facti sunt quasi stipula,\n ignis combussit eos;\n non liberabunt animam suam\n de manu flamm\u00e6;\n non sunt prun\u00e6 quibus calefiant,\n nec focus ut sedeant ad eum.\n15\u00a0Sic facta sunt tibi in quibuscumque laboraveras:\n negotiatores tui ab adolescentia tua,\n unusquisque in via sua erraverunt;\n non est qui salvet te.]","title":"Vulgate: Isaiah: Isaiah Chapter 47","type":"page"}