{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa050.htm","path":"bib/vul/isa050.htm","source_url":"https://sacred-texts.com/bib/vul/isa050.htm","text":"1\u00a0[H\u00e6c dicit Dominus:\n Quis est hic liber repudii matris vestr\u00e6,\n quo dimisi eam?\n aut quis est creditor meus,\n cui vendidi vos?\n Ecce in iniquitatibus vestris venditi estis,\n et in sceleribus vestris dimisi matrem vestram.\n2\u00a0Quia veni, et non erat vir;\n vocavi, et non erat qui audiret.\n Numquid abbreviata et parvula facta est manus mea,\n ut non possim redimere?\n aut non est in me virtus ad liberandum?\n Ecce in increpatione mea desertum faciam mare,\n ponam flumina in siccum;\n computrescent pisces sine aqua,\n et morientur in siti.\n3\u00a0Induam c\u00e6los tenebris,\n et saccum ponam operimentum eorum.]\n \n4\u00a0[Dominus dedit mihi\n linguam eruditam,\n ut sciam sustentare eum qui lassus est verbo.\n Erigit mane,\n mane erigit mihi aurem,\n ut audiam quasi magistrum.\n5\u00a0Dominus Deus aperuit mihi aurem,\n ego autem non contradico:\n retrorsum non abii.\n6\u00a0Corpus meum dedi percutientibus,\n et genas meas vellentibus;\n faciem meam non averti ab increpantibus\n et conspuentibus in me.\n7\u00a0Dominus Deus auxiliator meus,\n ideo non sum confusus;\n ideo posui faciem meam ut petram durissimam,\n et scio quoniam non confundar.\n8\u00a0Juxta est qui justificat me; quis contradicet mihi?\n Stemus simul;\n quis est adversarius meus? accedat ad me.\n9\u00a0Ecce Dominus Deus auxiliator meus;\n quis est qui condemnet me?\n Ecce omnes quasi vestimentum conterentur;\n tinea comedet eos.\n10\u00a0Quis ex vobis timens Dominum,\n audiens vocem servi sui?\n Qui ambulavit in tenebris,\n et non est lumen ei,\n speret in nomine Domini,\n et innitatur super Deum suum.\n11\u00a0Ecce vos omnes accendentes ignem,\n accincti flammis:\n ambulate in lumine ignis vestri,\n et in flammis quas succendistis;\n de manu mea factum est hoc vobis:\n in doloribus dormietis.]","title":"Vulgate: Isaiah: Isaiah Chapter 50","type":"page"}