{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa052.htm","path":"bib/vul/isa052.htm","source_url":"https://sacred-texts.com/bib/vul/isa052.htm","text":"1\u00a0[Consurge, consurge, induere fortitudine tua, Sion!\n induere vestimentis glori\u00e6 tu\u00e6,\n Jerusalem, civitas Sancti,\n quia non adjiciet ultra ut pertranseat per te\n incircumcisus et immundus.\n2\u00a0Excutere de pulvere, consurge;\n sede, Jerusalem!\n solve vincula colli tui,\n captiva filia Sion.\n3\u00a0Quia h\u00e6c dicit Dominus:\n Gratis venundati estis,\n et sine argento redimemini.\n4\u00a0Quia h\u00e6c dicit Dominus Deus:\n In \u00c6gyptum descendit populus meus in principio, ut colonus esset ibi,\n et Assur absque ulla causa calumniatus est eum.\n5\u00a0Et nunc quid mihi est hic, dicit Dominus,\n quoniam ablatus est populus meus gratis?\n Dominatores ejus inique agunt, dicit Dominus,\n et jugiter tota die nomen meum blasphematur.\n6\u00a0Propter hoc sciet populus meus nomen meum\n in die illa:\n quia ego ipse qui loquebar, ecce adsum.]\n \n7\u00a0[Quam pulchri super montes pedes annuntiantis\n et pr\u00e6dicantis pacem;\n annuntiantis bonum,\n pr\u00e6dicantis salutem,\n dicentis Sion:\n Regnabit Deus tuus!\n8\u00a0Vox speculatorum tuorum: levaverunt vocem,\n simul laudabunt,\n quia oculo ad oculum videbunt\n cum converterit Dominus Sion.\n9\u00a0Gaudete, et laudate simul,\n deserta Jerusalem,\n quia consolatus est Dominus populum suum;\n redemit Jerusalem.\n10\u00a0Paravit Dominus brachium sanctum suum\n in oculis omnium gentium;\n et videbunt omnes fines terr\u00e6\n salutare Dei nostri.\n11\u00a0Recedite, recedite; exite inde,\n pollutum nolite tangere;\n exite de medio ejus; mundamini,\n qui fertis vasa Domini.\n12\u00a0Quoniam non in tumultu exibitis,\n nec in fuga properabitis;\n pr\u00e6cedet enim vos Dominus,\n et congregabit vos Deus Isra\u00ebl.]\n \n13\u00a0[Ecce intelliget servus meus,\n exaltabitur et elevabitur, et sublimis erit valde.\n14\u00a0Sicut obstupuerunt super te multi,\n sic inglorius erit inter viros aspectus ejus,\n et forma ejus inter filios hominum.\n15\u00a0Iste asperget gentes multas;\n super ipsum continebunt reges os suum:\n quia quibus non est narratum de eo viderunt,\n et qui non audierunt contemplati sunt.]","title":"Vulgate: Isaiah: Isaiah Chapter 52","type":"page"}