{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa054.htm","path":"bib/vul/isa054.htm","source_url":"https://sacred-texts.com/bib/vul/isa054.htm","text":"1\u00a0[Lauda, sterilis, qu\u00e6 non paris;\n decanta laudem, et hinni, qu\u00e6 non pariebas:\n quoniam multi filii desert\u00e6\n magis quam ejus qu\u00e6 habet virum, dicit Dominus.\n2\u00a0Dilata locum tentorii tui,\n et pelles tabernaculorum tuorum extende:\n ne parcas:\n longos fac funiculos tuos,\n et clavos tuos consolida.\n3\u00a0Ad dexteram enim et ad l\u00e6vam penetrabis,\n et semen tuum gentes h\u00e6reditabit,\n et civitates desertas inhabitabit.\n4\u00a0Noli timere, quia non confunderis,\n neque erubesces; non enim te pudebit,\n quia confusionis adolescenti\u00e6 tu\u00e6 oblivisceris,\n et opprobrii viduitatis tu\u00e6 non recordaberis amplius.\n5\u00a0Quia dominabitur tui qui fecit te,\n Dominus exercituum nomen ejus,\n et redemptor tuus, Sanctus Isra\u00ebl:\n Deus omnis terr\u00e6 vocabitur.\n6\u00a0Quia et mulierem derelictam et m\u0153rentem spiritu\n vocavit te Dominus,\n et uxorem ab adolescentia abjectam,\n dixit Deus tuus.\n7\u00a0Ad punctum in modico dereliqui te,\n et in miserationibus magnis congregabo te.\n8\u00a0In momento indignationis abscondi\n faciem meam parumper a te;\n et in misericordia sempiterna misertus sum tui,\n dixit redemptor tuus, Dominus.\n9\u00a0Sicut in diebus No\u00eb istud mihi est,\n cui juravi ne inducerem aquas No\u00eb ultra super terram;\n sic juravi ut non irascar tibi,\n et non increpem te.\n10\u00a0Montes enim commovebuntur,\n et colles contremiscent;\n misericordia autem mea non recedet a te,\n et f\u0153dus pacis me\u00e6 non movebitur,\n dixit miserator tuus Dominus.\n11\u00a0Paupercula, tempestate convulsa absque ulla consolatione,\n ecce ego sternam per ordinem lapides tuos,\n et fundabo te in sapphiris:\n12\u00a0et ponam jaspidem propugnacula tua,\n et portas tuas in lapides sculptos,\n et omnes terminos tuos in lapides desiderabiles;\n13\u00a0universos filios tuos doctos a Domino,\n et multitudinem pacis filiis tuis.\n14\u00a0Et in justitia fundaberis:\n recede procul a calumnia, quia non timebis,\n et a pavore, quia non appropinquabit tibi.\n15\u00a0Ecce accola veniet qui non erat mecum,\n advena quondam tuus adjungetur tibi.\n16\u00a0Ecce ego creavi fabrum\n sufflantem in igne prunas,\n et proferentem vas in opus suum;\n et ego creavi interfectorem ad disperdendum.\n17\u00a0Omne vas quod fictum est contra te, non dirigetur,\n et omnem linguam resistentem tibi in judicio, judicabis.\n H\u00e6c est h\u00e6reditas servorum Domini,\n et justitia eorum apud me, dicit Dominus.]","title":"Vulgate: Isaiah: Isaiah Chapter 54","type":"page"}