{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa055.htm","path":"bib/vul/isa055.htm","source_url":"https://sacred-texts.com/bib/vul/isa055.htm","text":"1\u00a0[Omnes sitientes, venite ad aquas,\n et qui non habetis argentum,\n properate, emite, et comedite:\n venite, emite absque argento\n et absque ulla commutatione\n vinum et lac.\n2\u00a0Quare appenditis argentum non in panibus,\n et laborem vestrum non in saturitate?\n Audite, audientes me, et comedite bonum,\n et delectabitur in crassitudine anima vestra.\n3\u00a0Inclinate aurem vestram, et venite ad me;\n audite, et vivet anima vestra,\n et feriam vobiscum pactum sempiternum,\n misericordias David fideles.\n4\u00a0Ecce testem populis dedi eum,\n ducem ac pr\u00e6ceptorem gentibus.\n5\u00a0Ecce gentem quam nesciebas vocabis,\n et gentes qu\u00e6 te non cognoverunt ad te current,\n propter Dominum Deum tuum,\n et Sanctum Isra\u00ebl, quia glorificavit te.\n6\u00a0Qu\u00e6rite Dominum dum inveniri potest;\n invocate eum dum prope est.\n7\u00a0Derelinquat impius viam suam,\n et vir iniquus cogitationes suas,\n et revertatur ad Dominum, et miserebitur ejus;\n et ad Deum nostrum, quoniam multus est ad ignoscendum.\n8\u00a0Non enim cogitationes me\u00e6 cogitationes vestr\u00e6,\n neque vi\u00e6 vestr\u00e6 vi\u00e6 me\u00e6, dicit Dominus.\n9\u00a0Quia sicut exaltantur c\u00e6li a terra,\n sic exaltat\u00e6 sunt vi\u00e6 me\u00e6 a viis vestris,\n et cogitationes me\u00e6 a cogitationibus vestris.\n10\u00a0Et quomodo descendit imber et nix de c\u00e6lo,\n et illuc ultra non revertitur,\n sed inebriat terram, et infundit eam,\n et germinare eam facit,\n et dat semen serenti,\n et panem comedenti:\n11\u00a0sic erit verbum meum quod egredietur de ore meo;\n non revertetur ad me vacuum,\n sed faciet qu\u00e6cumque volui,\n et prosperabitur in his ad qu\u00e6 misi illud.\n12\u00a0Quia in l\u00e6titia egrediemini,\n et in pace deducemini;\n montes et colles cantabunt coram vobis laudem,\n et omnia ligna regionis plaudent manu.\n13\u00a0Pro saliunca ascendet abies,\n et pro urtica crescet myrtus;\n et erit Dominus nominatus\n in signum \u00e6ternum quod non auferetur.]","title":"Vulgate: Isaiah: Isaiah Chapter 55","type":"page"}