{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa056.htm","path":"bib/vul/isa056.htm","source_url":"https://sacred-texts.com/bib/vul/isa056.htm","text":"1\u00a0[H\u00e6c dicit Dominus:\n Custodite judicium, et facite justitiam,\n quia juxta est salus mea ut veniat,\n et justitia mea ut reveletur.\n2\u00a0Beatus vir qui facit hoc,\n et filius hominis qui apprehendet istud,\n custodiens sabbatum ne polluat illud,\n custodiens manus suas ne faciat omne malum.\n3\u00a0Et non dicat filius adven\u00e6 qui adh\u00e6ret Domino, dicens:\n Separatione dividet me Dominus a populo suo;\n et non dicat eunuchus:\n Ecce ego lignum aridum.\n4\u00a0Quia h\u00e6c dicit Dominus eunuchis:\n Qui custodierint sabbata mea,\n et elegerint qu\u00e6 ego volui,\n et tenuerint f\u0153dus meum,\n5\u00a0dabo eis in domo mea et in muris meis\n locum, et nomen\n melius a filiis et filiabus:\n nomen sempiternum dabo eis,\n quod non peribit.\n6\u00a0Et filios adven\u00e6, qui adh\u00e6rent Domino,\n ut colant eum, et diligant nomen ejus,\n ut sint ei in servos;\n omnem custodientem sabbatum ne polluat illud,\n et tenentem f\u0153dus meum;\n7\u00a0adducam eos in montem sanctum meum,\n et l\u00e6tificabo eos in domo orationis me\u00e6;\n holocausta eorum et victim\u00e6 eorum placebunt mihi super altari meo,\n quia domus mea domus orationis vocabitur\n cunctis populis.\n8\u00a0Ait Dominus Deus,\n qui congregat dispersos Isra\u00ebl:\n Adhuc congregabo ad eum\n congregatos ejus.]\n \n9\u00a0[Omnes besti\u00e6 agri,\n venite ad devorandum,\n univers\u00e6 besti\u00e6 saltus.\n10\u00a0Speculatores ejus c\u00e6ci omnes;\n nescierunt universi:\n canes muti non valentes latrare,\n videntes vana, dormientes,\n et amantes somnia.\n11\u00a0Et canes imprudentissimi\n nescierunt saturitatem;\n ipsi pastores\n ignoraverunt intelligentiam:\n omnes in viam suam declinaverunt;\n unusquisque ad avaritiam suam, a summo usque ad novissimum.\n12\u00a0Venite, sumamus vinum,\n et impleamur ebrietate;\n et erit sicut hodie, sic et cras,\n et multo amplius.]","title":"Vulgate: Isaiah: Isaiah Chapter 56","type":"page"}