{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa058.htm","path":"bib/vul/isa058.htm","source_url":"https://sacred-texts.com/bib/vul/isa058.htm","text":"1\u00a0[Clama, ne cesses,\n quasi tuba exalta vocem tuam,\n et annuntia populo meo scelera eorum,\n et domui Jacob peccata eorum.\n2\u00a0Me etenim de die in diem qu\u00e6runt,\n et scire vias meas volunt,\n quasi gens qu\u00e6 justitiam fecerit,\n et judicium Dei sui non dereliquerit.\n Rogant me judicia justiti\u00e6;\n appropinquare Deo volunt.\n3\u00a0Quare jejunavimus, et non aspexisti;\n humiliavimus animas nostras, et nescisti?\n Ecce in die jejunii vestri invenitur voluntas vestra,\n et omnes debitores vestros repetitis.\n4\u00a0Ecce ad lites et contentiones jejunatis,\n et percutitis pugno impie.\n Nolite jejunare sicut usque ad hanc diem,\n ut audiatur in excelso clamor vester.\n5\u00a0Numquid tale est jejunium quod elegi,\n per diem affligere hominem animam suam?\n numquid contorquere quasi circulum caput suum,\n et saccum et cinerem sternere?\n numquid istud vocabis jejunium,\n et diem acceptabilem Domino?]\n \n6\u00a0[Nonne hoc est magis jejunium quod elegi?\n Dissolve colligationes impietatis,\n solve fasciculos deprimentes,\n dimitte eos qui confracti sunt liberos,\n et omne opus dirumpe;\n7\u00a0frange esurienti panem tuum,\n et egenos vagosque induc in domum tuam;\n cum videris nudum, operi eum,\n et carnem tuam ne despexeris.\n8\u00a0Tunc erumpet quasi mane lumen tuum;\n et sanitas tua citius orietur,\n et anteibit faciem tuam justitia tua,\n et gloria Domini colliget te.\n9\u00a0Tunc invocabis, et Dominus exaudiet;\n clamabis, et dicet: Ecce adsum.\n Si abstuleris de medio tui catenam,\n et desieris extendere digitum et loqui quod non prodest;\n10\u00a0cum effuderis esurienti animam tuam,\n et animam afflictam repleveris,\n orietur in tenebris lux tua,\n et tenebr\u00e6 tu\u00e6 erunt sicut meridies.\n11\u00a0Et requiem tibi dabit Dominus semper,\n et implebit splendoribus animam tuam,\n et ossa tua liberabit;\n et eris quasi hortus irriguus,\n et sicut fons aquarum\n cujus non deficient aqu\u00e6.\n12\u00a0Et \u00e6dificabuntur in te deserta s\u00e6culorum,\n fundamenta generationis et generationis suscitabis;\n et vocaberis \u00e6dificator sepium,\n avertens semitas in quietem.\n13\u00a0Si averteris a sabbato pedem tuum\n facere voluntatem tuam in die sancto meo,\n et vocaveris sabbatum delicatum,\n et sanctum Domini gloriosum,\n et glorificaveris eum dum non facis vias tuas,\n et non invenitur voluntas tua, ut loquaris sermonem:\n14\u00a0tunc delectaberis super Domino,\n et sustollam te super altitudines terr\u00e6,\n et cibabo te h\u00e6reditate Jacob patris tui:\n os enim Domini locutum est.]","title":"Vulgate: Isaiah: Isaiah Chapter 58","type":"page"}