{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa061.htm","path":"bib/vul/isa061.htm","source_url":"https://sacred-texts.com/bib/vul/isa061.htm","text":"1\u00a0[Spiritus Domini super me,\n eo quod unxerit Dominus me;\n ad annuntiandum mansuetis misit me,\n ut mederer contritis corde,\n et pr\u00e6dicarem captivis indulgentiam,\n et clausis apertionem;\n2\u00a0ut pr\u00e6dicarem annum placabilem Domino,\n et diem ultionis Deo nostro;\n ut consolarer omnes lugentes,\n3\u00a0ut ponerem lugentibus Sion,\n et darem eis coronam pro cinere,\n oleum gaudii pro luctu,\n pallium laudis pro spiritu m\u0153roris;\n et vocabuntur in ea fortes justiti\u00e6,\n plantatio Domini ad glorificandum.\n4\u00a0Et \u00e6dificabunt deserta a s\u00e6culo,\n et ruinas antiquas erigent,\n et instaurabunt civitates desertas,\n dissipatas in generationem et generationem.\n5\u00a0Et stabunt alieni, et pascent pecora vestra,\n et filii peregrinorum agricol\u00e6 et vinitores vestri erunt.\n6\u00a0Vos autem sacerdotes Domini vocabimini:\n Ministri Dei nostri, dicetur vobis,\n fortitudinem gentium comedetis,\n et in gloria earum superbietis.\n7\u00a0Pro confusione vestra duplici et rubore,\n laudabunt partem suam;\n propter hoc in terra sua duplicia possidebunt,\n l\u00e6titia sempiterna erit eis.\n8\u00a0Quia ego Dominus diligens judicium,\n et odio habens rapinam in holocausto;\n et dabo opus eorum in veritate,\n et f\u0153dus perpetuum feriam eis.\n9\u00a0Et scient in gentibus semen eorum,\n et germen eorum in medio populorum;\n omnes qui viderint eos cognoscent illos,\n quia isti sunt semen cui benedixit Dominus.\n10\u00a0Gaudens gaudebo in Domino,\n et exsultabit anima mea in Deo meo,\n quia induit me vestimentis salutis,\n et indumento justiti\u00e6 circumdedit me,\n quasi sponsum decoratum corona,\n et quasi sponsam ornatam monilibus suis.\n11\u00a0Sicut enim terra profert germen suum,\n et sicut hortus semen suum germinat,\n sic Dominus Deus germinabit justitiam\n et laudem coram universis gentibus.]","title":"Vulgate: Isaiah: Isaiah Chapter 61","type":"page"}