{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa064.htm","path":"bib/vul/isa064.htm","source_url":"https://sacred-texts.com/bib/vul/isa064.htm","text":"1\u00a0[Utinam dirumperes c\u00e6los, et descenderes;\n a facie tua montes defluerent;\n2\u00a0sicut exustio ignis tabescerent,\n aqu\u00e6 arderent igni:\n ut notum fieret nomen tuum inimicis tuis;\n a facie tua gentes turbarentur.\n3\u00a0Cum feceris mirabilia, non sustinebimus;\n descendisti, et a facie tua montes defluxerunt.\n4\u00a0A s\u00e6culo non audierunt, neque auribus perceperunt;\n oculus non vidit, Deus, absque te,\n qu\u00e6 pr\u00e6parasti exspectantibus te.\n5\u00a0Occurristi l\u00e6tanti, et facienti justitiam;\n in viis tuis recordabuntur tui.\n Ecce tu iratus es, et peccavimus;\n in ipsis fuimus semper, et salvabimur.\n6\u00a0Et facti sumus ut immundus omnes nos,\n et quasi pannus menstruat\u00e6 univers\u00e6 justiti\u00e6 nostr\u00e6;\n et cecidimus quasi folium universi,\n et iniquitates nostr\u00e6 quasi ventus abstulerunt nos.\n7\u00a0Non est qui invocet nomen tuum;\n qui consurgat, et teneat te.\n Abscondisti faciem tuam a nobis,\n et allisisti nos in manu iniquitatis nostr\u00e6.\n8\u00a0Et nunc, Domine, pater noster es tu,\n nos vero lutum;\n et fictor noster tu,\n et opera manuum tuarum omnes nos.\n9\u00a0Ne irascaris, Domine, satis,\n et ne ultra memineris iniquitatis nostr\u00e6;\n ecce, respice, populus tuus omnes nos.\n10\u00a0Civitas Sancti tui facta est deserta,\n Sion deserta facta est,\n Jerusalem desolata est.\n11\u00a0Domus sanctificationis nostr\u00e6 et glori\u00e6 nostr\u00e6,\n ubi laudaverunt te patres nostri,\n facta est in exustionem ignis,\n et omnia desiderabilia nostra versa sunt in ruinas.\n12\u00a0Numquid super his continebis te, Domine;\n tacebis, et affliges nos vehementer?]","title":"Vulgate: Isaiah: Isaiah Chapter 64","type":"page"}