{"collection":"Bible & Christianity","html_url":"https://unchartedknowledge.5gfusion.net/browse/bib/vul/isa065.htm","path":"bib/vul/isa065.htm","source_url":"https://sacred-texts.com/bib/vul/isa065.htm","text":"1\u00a0[Qu\u00e6sierunt me qui ante non interrogabant;\n invenerunt qui non qu\u00e6sierunt me.\n Dixi: Ecce ego, ecce ego,\n ad gentem qu\u00e6 non invocabat nomen meum.\n2\u00a0Expandi manus meas tota die\n ad populum incredulum,\n qui graditur in via non bona\n post cogitationes suas.\n3\u00a0Populus qui ad iracundiam provocat me\n ante faciem meam semper;\n qui immolant in hortis,\n et sacrificant super lateres;\n4\u00a0qui habitant in sepulchris,\n et in delubris idolorum dormiunt;\n qui comedunt carnem suillam,\n et jus profanum in vasis eorum;\n5\u00a0qui dicunt: Recede a me,\n non appropinques mihi, quia immundus es.\n Isti fumus erunt in furore meo,\n ignis ardens tota die.\n6\u00a0Ecce scriptum est coram me:\n Non tacebo, sed reddam,\n et retribuam in sinum eorum.\n7\u00a0Iniquitates vestras, et iniquitates patrum vestrorum simul,\n dicit Dominus;\n qui sacrificaverunt super montes,\n et super colles exprobraverunt mihi;\n et remetiar opus eorum primum\n in sinu eorum.\n8\u00a0H\u00e6c dicit Dominus:\n Quomodo si inveniatur granum in botro,\n et dicatur: Ne dissipes illud,\n quoniam benedictio est:\n sic faciam propter servos meos,\n ut non disperdam totum.\n9\u00a0Et educam de Jacob semen,\n et de Juda possidentem montes meos;\n et h\u00e6reditabunt eam electi mei,\n et servi mei habitabunt ibi.\n10\u00a0Et erunt campestria in caulas gregum,\n et vallis Achor in cubile armentorum,\n populo meo qui requisierunt me.\n11\u00a0Et vos qui dereliquistis Dominum,\n qui obliti estis montem sanctum meum,\n qui ponitis fortun\u00e6 mensam,\n et libatis super eam:\n12\u00a0numerabo vos in gladio,\n et omnes in c\u00e6de corruetis:\n pro eo quod vocavi, et non respondistis;\n locutus sum, et non audistis;\n et faciebatis malum in oculis meis,\n et qu\u00e6 nolui elegistis.\n13\u00a0Propter hoc h\u00e6c dicit Dominus Deus:\n Ecce servi mei comedent,\n et vos esurietis;\n ecce servi mei bibent,\n et vos sitietis;\n14\u00a0ecce servi mei l\u00e6tabuntur,\n et vos confundemini;\n ecce servi mei laudabunt pr\u00e6 exsultatione cordis,\n et vos clamabitis pr\u00e6 dolore cordis,\n et pr\u00e6 contritione spiritus ululabitis,\n15\u00a0et dimittetis nomen vestrum in juramentum electis meis;\n et interficiet te Dominus Deus,\n et servos suos vocabit nomine alio:\n16\u00a0in quo qui benedictus est super terram\n benedicetur in Deo, amen,\n et qui jurat in terra\n jurabit in Deo, amen:\n quia oblivioni tradit\u00e6 sunt angusti\u00e6 priores,\n et quia abscondit\u00e6 sunt ab oculis meis.\n17\u00a0Ecce enim ego creo c\u00e6los novos,\n et terram novam;\n et non erunt in memoria priora,\n et non ascendent super cor.\n18\u00a0Sed gaudebitis et exsultabitis usque in sempiternum\n in his qu\u00e6 ego creo:\n quia ecce ego creo Jerusalem exsultationem,\n et populum ejus gaudium.\n19\u00a0Et exsultabo in Jerusalem,\n et gaudebo in populo meo,\n et non audietur in eo ultra\n vox fletus et vox clamoris.\n20\u00a0Non erit ibi amplius infans dierum,\n et senex qui non impleat dies suos,\n quoniam puer centum annorum morietur,\n et peccator centum annorum maledictus erit.\n21\u00a0Et \u00e6dificabunt domos, et habitabunt;\n et plantabunt vineas, et comedent fructus earum.\n22\u00a0Non \u00e6dificabunt, et alius habitabit;\n non plantabunt, et alius comedet:\n secundum enim dies ligni erunt dies populi mei,\n et opera manuum eorum inveterabunt.\n23\u00a0Electi mei non laborabunt frustra,\n neque generabunt in conturbatione,\n quia semen benedictorum Domini est,\n et nepotes eorum cum eis.\n24\u00a0Eritque antequam clament, ego exaudiam;\n adhuc illis loquentibus, ego audiam.\n25\u00a0Lupus et agnus pascentur simul,\n leo et bos comedent paleas,\n et serpenti pulvis panis ejus.\n Non nocebunt, neque occident\n in omni monte sancto meo, dicit Dominus.]","title":"Vulgate: Isaiah: Isaiah Chapter 65","type":"page"}