{"collection":"Bible & Christianity","html_url":"https://unchartedknowledge.5gfusion.net/browse/bib/vul/jam004.htm","path":"bib/vul/jam004.htm","source_url":"https://sacred-texts.com/bib/vul/jam004.htm","text":"1 Unde bella et lites in vobis? nonne hinc: ex concupiscentiis vestris, qu\u00e6 militant in membris vestris?\n2 concupiscitis, et non habetis: occiditis, et zelatis: et non potestis adipisci: litigatis, et belligeratis, et non habetis, propter quod non postulatis.\n3 Petitis, et non accipitis: eo quod male petatis: ut in concupiscentiis vestris insumatis.\n4 Adulteri, nescitis quia amicitia hujus mundi inimica est Dei? quicumque ergo voluerit amicus esse s\u00e6culi hujus, inimicus Dei constituitur.\n5 An putatis quia inaniter Scriptura dicat: Ad invidiam concupiscit spiritus qui habitat in vobis?\n6 majorem autem dat gratiam. Propter quod dicit: Deus superbis resistit, humilibus autem dat gratiam.\n7 Subditi ergo estote Deo, resistite autem diabolo, et fugiet a vobis.\n8 Appropinquate Deo, et appropinquabit vobis. Emundate manus, peccatores: et purificate corda, duplices animo.\n9 Miseri estote, et lugete, et plorate: risus vester in luctum convertatur, et gaudium in m\u0153rorem.\n10 Humiliamini in conspectu Domini, et exaltabit vos.\n11 Nolite detrahere alterutrum fratres. Qui detrahit fratri, aut qui judicat fratrem suum, detrahit legi, et judicat legem. Si autem judicas legem, non es factor legis, sed judex.\n12\u00a0Unus est legislator et judex, qui potest perdere et liberare.\n \n13 Tu autem quis es, qui judicas proximum? Ecce nunc qui dicitis: Hodie, aut crastino ibimus in illam civitatem, et faciemus ibi quidem annum, et mercabimur, et lucrum faciemus:\n14 qui ignoratis quid erit in crastino.\n15 Qu\u00e6 est enim vita vestra? vapor est ad modicum parens, et deinceps exterminabitur; pro eo ut dicatis: Si Dominus voluerit. Et: Si vixerimus, faciemus hoc, aut illud.\n16 Nunc autem exsultatis in superbiis vestris. Omnis exsultatio talis, maligna est.\n17 Scienti igitur bonum facere, et non facienti, peccatum est illi.","title":"Vulgate: James: James Chapter 4","type":"page"}