{"collection":"Bible & Christianity","html_url":"https://unchartedknowledge.5gfusion.net/browse/bib/vul/jdg002.htm","path":"bib/vul/jdg002.htm","source_url":"https://sacred-texts.com/bib/vul/jdg002.htm","text":"1 Ascenditque angelus Domini de Galgalis ad Locum flentium, et ait: Eduxi vos de \u00c6gypto, et introduxi in terram, pro qua juravi patribus vestris: et pollicitus sum ut non facerem irritum pactum meum vobiscum in sempiternum,\n2 ita dumtaxat ut non feriretis f\u0153dus cum habitatoribus terr\u00e6 hujus, sed aras eorum subverteretis: et noluistis audire vocem meam: cur hoc fecistis?\n3 Quam ob rem nolui delere eos a facie vestra: ut habeatis hostes, et dii eorum sint vobis in ruinam.\n4 Cumque loqueretur angelus Domini h\u00e6c verba ad omnes filios Isra\u00ebl, elevaverunt ipsi vocem suam, et fleverunt.\n5\u00a0Et vocatum est nomen loci illius, Locus flentium, sive lacrimarum: immolaveruntque ibi hostias Domini.\n \n6 Dimisit ergo Josue populum, et abierunt filii Isra\u00ebl unusquisque in possessionem suam, ut obtinerent eam:\n7 servieruntque Domino cunctis diebus ejus, et seniorum, qui longo post eum vixerunt tempore, et noverant omnia opera Domini qu\u00e6 fecerat cum Isra\u00ebl.\n8 Mortuus est autem Josue filius Nun, famulus Domini, centum et decem annorum,\n9 et sepelierunt eum in finibus possessionis su\u00e6 in Thamnathsare in monte Ephraim, a septentrionali plaga montis Gaas.\n10\u00a0Omnisque illa generatio congregata est ad patres suos: et surrexerunt alii, qui non noverant Dominum, et opera qu\u00e6 fecerat cum Isra\u00ebl.\n \n11 Feceruntque filii Isra\u00ebl malum in conspectu Domini, et servierunt Baalim.\n12 Ac dimiserunt Dominum Deum patrum suorum, qui eduxerat eos de terra \u00c6gypti, et secuti sunt deos alienos, deosque populorum, qui habitabant in circuitu eorum, et adoraverunt eos: et ad iracundiam concitaverunt Dominum,\n13 dimittentes eum, et servientes Baal et Astaroth.\n14 Iratusque Dominus contra Isra\u00ebl, tradidit eos in manus diripientium: qui ceperunt eos, et vendiderunt hostibus qui habitabant per gyrum: nec potuerunt resistere adversariis suis,\n15\u00a0sed quocumque pergere voluissent, manus Domini super eos erat, sicut locutus est, et juravit eis, et vehementer afflicti sunt.\n \n16 Suscitavitque Dominus judices, qui liberarent eos de vastantium manibus: sed nec eos audire voluerunt,\n17 fornicantes cum diis alienis, et adorantes eos. Cito deseruerunt viam, per quam ingressi fuerant patres eorum: et audientes mandata Domini, omnia fecere contraria.\n18 Cumque Dominus judices suscitaret, in diebus eorum flectebatur misericordia, et audiebat afflictorum gemitus, et liberabat eos de c\u00e6de vastantium.\n19 Postquam autem mortuus esset judex, revertebantur, et multo faciebant pejora quam fecerant patres eorum, sequentes deos alienos, servientes eis, et adorantes illos. Non dimiserunt adinventiones suas, et viam durissimam per quam ambulare consueverunt.\n20 Iratusque est furor Domini in Isra\u00ebl, et ait: Quia irritum fecit gens ista pactum meum, quod pepigeram cum patribus eorum, et vocem meam audire contempsit:\n21 et ego non delebo gentes, quas dimisit Josue, et mortuus est:\n22 ut in ipsis experiar Isra\u00ebl, utrum custodiant viam Domini, et ambulent in ea, sicut custodierunt patres eorum, an non.\n23 Dimisit ergo Dominus omnes nationes has, et cito subvertere noluit, nec tradidit in manus Josue.","title":"Vulgate: Judges: Judges Chapter 2","type":"page"}